অসমৰ শিক্ষামন্ত্ৰীৰ পৰা মুখ্যমন্ত্ৰী হোৱালৈকে সুদীর্ঘ ২০ টা বছৰ হিমন্ত বিশ্ব শৰ্মাই অসমৰ শিক্ষা ব্যৱস্থা অধপতনলৈ লৈ গৈছে। মেট্ৰিক পৰীক্ষাৰ বহী গৰুৱে খোৱাৰ পৰা আৰম্ভ কৰি অসমৰ হাজাৰ হাজাৰ বিদ্যালয় বন্ধ কৰা, আধাতে স্কুল সামৰাত দেশৰ ১ নম্বৰ ৰাজ্য হিচাপে গঢ়ি তোলাৰ পৰা পৰীক্ষাৰ প্রশ্নকাকত ফাদিললৈকে সকলোতে স্বর্ণপদক পাবলৈ সক্ষম হৈছে।
যোৱা ২২ মার্চ ২০২৫ তাৰিখে উচ্চতৰ মাধ্যমিক প্ৰথম বৰ্ষৰ পৰীক্ষাৰ প্ৰশ্নকাকত ফাদিল হোৱাৰ পিছত আজি পর্যন্ত পৰীক্ষা অনুষ্ঠিত হ’ব নে নহয় ৰাজ্যৰ শিক্ষা বিভাগ তথা মুখ্যমন্ত্রীয়ে ছাত্র-ছাত্ৰীক আশ্বাস দিব পৰা নাই।
সংবাদ মাধ্যমলৈ প্ৰেৰণ কৰা প্ৰেছ বিবৃতিযোগে ছাত্র মুক্তি সংগ্ৰাম সমিতি অসমৰ সভাপতি পাপু দত্ত, সাধাৰণ সম্পাদক ৰাহুল ছেত্ৰী আৰু প্ৰাঞ্জল কলিতাই হিমন্ত বিশ্ব শৰ্মাই হাতে-কাম লাগি ৰাজ্যৰ শিক্ষা ব্যৱস্থা শ্মশানলৈ লৈ যোৱাত সহায় কৰিছে বুলি মুখ্যমন্ত্রীক সমালোচনা কৰে।
যি সময়ত উচ্চতৰ মাধ্যমিক প্ৰথম বৰ্ষৰ ছাত্ৰ-ছাত্ৰীসকলে বছৰজোৰা পঢ়ি পৰীক্ষাৰ বাবে নিজকে প্রস্তুত কৰে সেই সময়তে হিমন্ত বিশ্ব শৰ্মাৰ শিক্ষা বিভাগত বিশ্ব অভিলেখ সৃষ্টি কৰি প্ৰশ্নকাকত ফাদিলৰ দৰে ঘটনাৰ সৃষ্টি হয়। একপক্ষত ক’বলৈ গ’লে ছাত্র-ছাত্রীসকলক মানসিকভাৱে হাৰাশাস্তি কৰাৰ লগতে অসমত উচ্চ শিক্ষা যেন এক প্রহ সনত পৰিণত কৰিছে। ২৪ ঘণ্টাই এক্টিভ মুখ্যমন্ত্ৰীয়ে ধাৰ লৈ হিতাধিকাৰীক টকা দিবলৈ হিচাপ ঠিকেই কৰে কিন্তু ৰাজ্যৰ ছাত্ৰ-ছাত্ৰীসকলক কেনেকৈ শিক্ষিত কৰিব লাগিব তাক লৈ পিঠি দিয়ে।
সংগঠনটোৰ নেতৃবর্গই উল্লেখ কৰে যে মিটিঙৰ মাজতে ব্যক্তি বিশেষক আঁচনি অর্পণ কৰি টিআৰপি ল’ব বিচৰা হিমন্ত বিশ্ব শর্মাই আজি দহ দিন উকলি যোৱাৰ পিছতো উচ্চতৰ মাধ্যমিক প্ৰথম বৰ্ষৰ পৰীক্ষা কেতিয়া অনুষ্ঠিত হ’ব তাক লৈ স্থিতি স্পষ্ট কৰিব নোৱাৰাটো মুখ্যমন্ত্ৰীৰ ব্যৰ্থতাৰ বাহিৰে আন একো নহয়। ছাত্ৰ-ছাত্ৰীৰ জীৱনকলৈ হেতালি খেলাৰ বিৰুদ্ধে সকীয়াই দি সংগঠনটোৰ নেতৃবর্গই বহাগ বিহুৰ আগত উচ্চতৰ মাধ্যমিক প্ৰথম বৰ্ষৰ বাতিল হোৱা পৰীক্ষাসমূহ পুনৰ অনুষ্ঠিত কৰিবলৈ দাবী জনায়।
