ৰাজ্যখনৰ আৰক্ষী বাহিনীৰ উন্নীতকৰণ তথা আধুনিকীকৰণৰ উদ্দেশ্যেৰে মুখ্য মন্ত্ৰী সোণোৱালে ৰাজ্যখনৰ আৰক্ষী সঞ্চালক প্ৰধান তথা ৰাজ্যৰ গৃহ বিভাগক ৰাজ্যখনত আৰক্ষীৰ আধুনিকীকৰণ প্ৰকল্পৰ ক্ষিপ্ৰ ৰূপায়নৰ নিৰ্দেশ দিছে।
মুখ্য মন্ত্ৰী সোণোৱালে শনিবাৰে জনতা ভৱনৰ মুখ্য মন্ত্ৰীৰ সভাকক্ষত অসম আৰক্ষীৰ আধুনিকীকৰণ প্ৰকল্পৰ পৰ্যালোচনা কৰে।
সোণোৱালে কয় যে আৰক্ষী বাহিনীৰ আধুনিকীকৰণৰ আৰু আৰক্ষীৰ আন্ত:গাঁথনি উন্নীতকৰণ আৰক্ষী বাহিনীৰ দক্ষতা বৃদ্ধিত বিশেষ বৰঙণি যোগাব পাৰে।
তেওঁ অসম আৰক্ষীৰ গৃহ নিৰ্মাণ নিগমৰ অধ্যক্ষ অনিল কুমাৰ ঝাক মৈত্ৰী আঁচনিৰ অধীনত আৰক্ষী থানাৰ নিৰ্মাণৰ কাম ক্ষিপ্ৰতাৰে সম্পূৰ্ণ কৰিবলৈ নিৰ্দেশ দিয়ে।
সোণোৱালে কয় যে মৈত্ৰী আঁচনিৰ অধীনত নিৰ্মাণ কৰা অত্যাধুনিক আৰক্ষী থানাসমূহে বিপদৰ সময়ত জনসাধাৰণক সেৱা আগবঢ়োৱা আৰক্ষীৰ লোকসকলৰ মৰ্যাদা বৃদ্ধি কৰিব।
মুখ্য মন্ত্ৰী সোণোৱালে গুৱাহাটীৰ পুলিচ ট্ৰেনজিট কেম্পৰ নিৰ্মাণৰ কামৰ অগ্ৰগতিৰ বুজ লয় আৰু অসম আৰক্ষীৰ গৃহ নিৰ্মাণ নিগমৰ অধ্যক্ষক অগ্ৰাধিকাৰ ভিত্তিত নিৰ্মাণ সম্পূৰ্ণ কৰিবলৈ নিৰ্দেশ দিয়ে যাতে আন জিলাৰ পৰা গুৱাহাটীলৈ অহা আৰক্ষী বিষয়াসকলৰ থকাৰ সমস্যাটো সমাধা হয়।
সোণোৱালে লগতে আধুনিক ট্ৰেফিক ছিগনেল ব্যৱস্থা, অসম পুলিচ একাডেমীৰ নিৰ্মাণ, ই-চালান ব্যৱস্থা, আৰক্ষী স্মাৰক, গাঁওৰক্ষী বাহিনীৰ সবলীকৰণৰ আঁচনিসমূহৰ ৰূপায়ন কি পৰ্যায়ত আছে সেই সম্পৰ্কেও পৰ্যালোচনা কৰে।
মুখ্য মন্ত্ৰীয়ে এই প্ৰকল্পসমূহৰ ৰূপায়নৰ সৈতে জড়িত জ্যেষ্ঠ বিষয়াসকলক নিৰ্দিষ্ট কৰি দিয়া সময়ৰ ভিতৰত সম্পূৰ্ণ কৰাৰ নিৰ্দেশ দিয়ে।
