আজি পুৱাই মুখ্যমন্ত্ৰী হিমন্ত বিশ্ব শৰ্মা ৰাওনা হয় বিটিএডিৰ সদৰ কোকৰাঝাৰলৈ।
মুখ্যমন্ত্ৰীৰ বাবে স্থলপথেৰে মাত্ৰ ২-২.৩০ ঘণ্টাৰ বাট কোকৰাঝাৰলৈ যাবলৈ মুখ্যমন্ত্ৰীগৰাকীয়ে ব্যৱহাৰ কৰিলে বিলাসবহুল হেলিকপ্তাৰ। যিটো সময়ত অসমে হাজাৰ হাজাৰ কোটি টকা ঋণ ল’বলগীয়া হৈছে সেই সময়তে কেৱল বিয়া খাবলৈ মুখ্যমন্ত্ৰীয়ে হেলিকপ্তাৰ ব্যৱহাৰ কৰাৰ কথাটোৱে সচেতন মহলক ভবাই তুলিছে।
বহুতে প্ৰশ্ন কৰিছে বিয়া খোৱাৰ নামতে যদি ৰাজ্যৰ মুখ্যমন্ত্ৰীগৰাকীয়ে এনেদৰে ৰাজকোষৰ ধন পানীৰ দৰে উৰুৱাই দিয়ে তেন্তে ৰাজ্যৰ উন্নয়ন হ’ব কিদৰে?
আজি দিনৰ ১১-১৫ বজাত মুখ্যমন্ত্ৰী হিমন্ত বিশ্ব শৰ্মাই হেলিকপ্তাৰেৰে গৈ বিটিচিৰ সদৰ কাৰ্যালয়ৰ সমীপৰ গ্ৰীণ ফিল্ডত অৱতৰণ কৰে। তাৰ পৰাই তেওঁ গৈ এবছুৰ প্ৰাক্তন নেতা মনেশ্বৰ দৈমাৰীৰ বিবাহস্থলীত উপস্থিত হয়গৈ।
মুখ্যমন্ত্ৰীয়ে বিবাহস্থলীত উপস্থিত হৈ দৰা-কইনাক যুগ্ম জীৱনৰ আশীৰ্বাদ দিলে ।
মুখ্যমন্ত্ৰীক সংগ দিলে অসম বিধান সভাৰ অধ্যক্ষ বিশ্বজিত দৈমাৰী, মন্ত্ৰী ইউ জি ব্ৰহ্ম, বিধায়ক লৰেঞ্চ ইছলাৰী, বি টি আৰৰ কাৰ্যবাহী সদস্য অৰুপ কুমাৰ দে আদি ব্যক্তিসকলে।
মনেশ্বৰ দৈমাৰী এবছুৰ এগৰাকী অক্লান্ত কৰ্মী। বড়ো জাতীয় সংগ্ৰামত নিখিল বড়ো ছাত্ৰ সন্থাৰ সৈতে তেওঁ ২২ বছৰ ধৰি অক্লান্ত ভাবে সেৱা আগবঢ়াইছিল।
কোকৰাঝাৰ খাৰগাঁওস্থিত নিজ গৃহত বাক্সা জিলাৰ মোদাই গাঁওৰ চম্পা বড়োৰ সৈতে তেওঁৰ বিবাহ সম্পন্ন হয়| বাথৌ ধৰ্মীয় ৰীতি নীতিৰে দৰা মনেশ্বৰ দৈমাৰীয়ে কইনা চম্পা বড়োৰ সৈতে বিবাহপাশত আৱদ্ধ হৈ যুগ্ম জীৱনৰ নতুন ইনিংছ মুকলি কৰে|
বিবাহস্থলীত উপস্থিত থাকি ৰাজনৈতিক প্ৰতিক্ৰিয়াও ব্যক্ত কৰিলে মুখ্য মন্ত্ৰীয়ে । মুখ্যমন্ত্ৰীয়ে কয় যে বি পি এফৰ সৈতে মিত্ৰতা হৈছে কেৱল বিধান সভাত, এয়া ৰাজনৈতিক মিত্ৰতা নহয়।
মনেশ্বৰ দৈমাৰীৰ যুগ্ম জীৱনৰ শুভেচ্ছা জ্ঞাপন কৰিলে অসম বিধান সভাৰ অধ্যক্ষ বিশ্বজিত দৈমাৰীয়েও। বি পি এফৰ সৈতে বিধান সভাত মিত্ৰতা হোৱাৰ ফলত ইউ পি পি এলৰ কোনো ধৰণৰ ক্ষতি নহয় বুলি প্ৰতিক্ৰিয়া প্ৰকাশ কৰিলে বিধায়ক লৰেঞ্চ ইছলাৰীয়ো। বিয়াৰ খাদ্য সম্ভাৰৰ জুটি লৈ আপ্লুত হৈ পৰিল মুখ্যমন্ত্ৰী ।
যি কি নহওঁক, মুখ্যমন্ত্ৰীয়ে বিবাহ অনুষ্ঠানত উপস্থিত হৈ দৰা-কইনাক আশীৰ্বাদ দিয়া কথাক সকলোৱে শলাগিছে যদিও বিয়া খাবলৈ হেলিকপ্তাৰ উৰুওৱাৰ কথাটোহে বহুতে সহজ ভাবে ল’ব পৰা নাই। এবছুৰ প্ৰাক্তন নেতা মনেশ্বৰ দৈমাৰীৰ যুগ্ম জীৱনৰ আন্তৰিক শুভেচ্ছা আমিও জ্ঞাপন কৰিলোঁ।
