বিশ্ব ঐতিহ্য ক্ষেত্ৰ কাজিৰঙা ৰাষ্ট্ৰীয় উদ্যানৰ কহৰাত থকা বিলাসী হোটেল বৰগছত আজি অসম আৰক্ষীৰ এখন উচ্চস্তৰীয় বৈঠক মুখ্যমন্ত্ৰী ডঃ হিমন্তবিশ্ব শৰ্মাৰ অধ্যক্ষতাত অনুষ্ঠিত হয় ৷
আলোচনাৰ শেষত মুখ্যমন্ত্ৰী গৰাকীয়ে এক সংবাদ মেল সম্বোধন কৰে ।
সংবাদ মেলত মুখ্যমন্ত্ৰী গৰাকীয়ে মন্তব্য কৰে যে অসম আৰক্ষীক আধুনিকীকৰণৰ ক্ষেত্ৰত আলোচনা কৰিবলৈকে আজি আমি আলোচনাত মিলিত হলো ।
আলোচনাত অসম আৰক্ষীৰ সকলোবোৰ দিশৰ ওপৰত বিশ্লেষাত্মক আলোচনা কৰা হয় ৷ আলোচনাৰ শেষত আমি কেতবোৰ সিদ্ধান্ততো উপনীত হওঁ ৷
মুখ্যমন্ত্ৰী গৰাকীৰ মতে প্ৰতি ছমাহৰ অন্তৰে অন্তৰে ৰাজ্যৰ আৰক্ষী অধীক্ষক সকলৰ সৈতে এনেদৰে বৈঠকত মিলিত হ’ব ।
পৰৱৰ্তী বৈঠকখন দুলীয়াজানত অনুষ্ঠিত হ’ব । তদুপৰি আৰক্ষী অধীক্ষক সকলৰ দৰে উপায়ুক্ত সকলৰো একোখনকৈ বৈঠক প্ৰতি ছয়মাহৰ অন্তৰে অন্তৰে অনুষ্ঠিত হ’ব বুলিও তেওঁ জনায় ।
উপায়ুক্ত সকলৰ আগন্তুক বৈঠকখন অহা ৩০ আগষ্টৰ ভিতৰত ডিফুত অনুষ্ঠিত হ’ব বুলি জানিবলৈ দি মুখ্যমন্ত্ৰী ডঃ হিমন্ত বিশ্ব শৰ্মাই অসম আৰক্ষীক সু-সজ্জিত কৰাৰ বাবে আগন্তুক সময়খিনিত ১০ টা আৰক্ষী বেটেলিয়ন গঠন কৰাৰ বাবে চৰকাৰে গুৰুত্বপূৰ্ণ সিদ্ধান্ত গ্ৰহণ কৰা বুলি ঘোষণা কৰে ।
তেওঁৰ মতে ৰাজ্যখনৰ সীমান্তৱৰ্তী স্পৰ্শকাতৰ অঞ্চল সমুহত এই বেটেলিয়ন সমুহ নিয়োগ কৰা হ’ব । বিশেষকৈ অসম – নাগালেণ্ড সীমান্ত, তিনিচুকীয়া জিলাৰ স্পৰ্শকাতৰ অঞ্চল,বিটিআৰ অঞ্চল, পাৰ্বত্য জিলা সমুহত নিয়োজিত কৰা হ’ব এই বেটেলিয়নৰ জোৱান সকলক ।
মুখ্যমন্ত্ৰীৰ মতে প্ৰতি বছৰে চৰকাৰে যি এক লাখ নিবনুৱা যুৱক-যুৱতীক সংস্থাপন কৰা কথা কৈছিল তাৰে অংশ স্বৰূপে এই বেটেলিয়নত নিযুক্তি দিয়াৰ উপৰিও উপ-পৰিদৰ্শক পৰ্যায়ত খালী থকা পদতো নিৱনুৱা যুৱক যুৱতীক নিযুক্তি দিয়া হ’ব ।
ইয়াৰ উপৰিও ৰাজ্যখনত আৰু সাতটা ফৰেনচিক লে’ৱৰটৰী স্থাপনৰ বাবে আজিৰ বৈঠকত সিদ্ধান্ত গ্ৰহণ কৰা বুলি সদৰি কৰে মুখ্যমন্ত্ৰী ডঃ হিমন্তবিশ্ব শৰ্মাই ৷ সংবাদ মেলত ড৹ শৰ্মাই আৰু কয় যে অসমত এতিয়াৰ পৰা কোনো ধৰনৰ গৰুৰ চোৰাং বেহা চলিবলৈ দিয়া নহ’ব ।
পশ্চিমবঙ্গৰ পৰা অসমৰ পথেৰে অহা গৰুৰো বেহা ইতিমধ্যে নিষিদ্ধ কৰা হৈছে । ৰাজ্যত চলা ড্ৰাগচ বিৰুদ্ধী অভিযানৰ ওপৰত মন্তব্য কৰি মুখ্যমন্ত্ৰী গৰাকীয়ে কয় যে ড্ৰাগছ সেৱন আৰু ড্ৰাগছৰ ব্যৱসায়ৰ ক্ষেত্ৰত অসম আৰক্ষীয়ে শূণ্য সহনশীলতা নীতিৰে প্ৰতিৰোধ কৰিব আৰু এই ক্ষেত্ৰত আৰক্ষী সঞ্চালক প্ৰধান ভাস্কৰজ্যোতি মহন্ত আৰু বিশেষ আৰক্ষী সঞ্চালক প্ৰধান জি পি সিঙে দৃষ্টি ৰাখিব বুলিও সংবাদ মেল মুখ্যমন্ত্ৰী ড৹ হিমন্ত বিশ্ব শৰ্মাই মন্তব্য কৰে ৷ আজিৰ এই বৈঠক মুখ্যমন্ত্ৰীৰ ভাষণেৰেই সামৰণি পৰে ৷
