বৃহস্পতিবাৰে ৰাজ্যৰ মুখমন্ত্ৰী হিমন্ত বিশ্ব শৰ্মাই শিলচৰত সংবাদ মাধ্যমৰ আগত পৃথক বৰকালেণ্ডৰ দাবী সন্দভৰ্ত কৰা এক মন্তব্যই ৰাজ্যখনৰ ৰাজনৈতিক মহলত বিতৰ্কৰ সৃষ্টি কৰিছে।
বিভিন্ন সময়ত বৰাক উপত্যকাত পূথক বৰাক ৰাজ্যৰ দাবী উত্থাপন হৈ অহাৰ সময়তে শিলচৰত জলমিত্ৰ সন্মিলনৰ শেষত সাংবাদিকসকলৰ সন্মুখীন হোৱা মুখ্যমন্ত্ৰীগৰাকীক সাংবাদিকে এই সন্দৰ্ভত প্ৰশ্ন কৰিছিল।
সাংবাদিকৰ প্ৰশ্নৰ উত্তৰত মুখ্যমন্ত্ৰী হিমন্ত বিশ্ব শৰ্মাই কয়, ‘’বৰাকলেণ্ড হৈছে বৰাকবাসীৰ সিদ্ধান্ত। যদি বৰাকবাসীয়ে পৃথক বৰাকলেণ্ড বিচাৰে, আমি বিৰোধিতা নকৰো। আমি কিয় বিৰোধিতা কৰিম? সেয়া যদি বৰাকবাসীয়ে লোৱা সিদ্ধান্ত হয় আমাৰ ক’বলৈ নাই।‘’
মুখ্যমন্ত্ৰীগৰাকীয়ে লগতে মন্তব্য কৰে যে ‘অৱশ্যে বাওঁপন্থীসকলে নহয়, বৰাকবাসীয়ে এই সিদ্ধান্ত ল’ব’।
তেওঁ কয়, ‘’মই মুখ্যমন্ত্ৰী হিচাপে সকলোকে একেলগে বাস কৰাটো ৰিচাৰো। যদি কোনোৱে পৃথকভাৱে বাস কৰিব বিচাৰে, তেনেহ’লে তেওঁলোকে প্রথমে বৰাক উপত্যকাৰ জনসাধাৰণৰ মতামত ল’ব লাগিব। বৰাক উপত্যকাৰ জনগণে সমুহীয়াভাৱে ক’ব লাগিব, বাওঁপন্থীসকলে বা আপোনালোকে দেখা দুই-তিনিজন লোকে নহয়।‘’
মুখ্যমন্ত্ৰীয়ে কয় যে কিছু লোকে পৃথক বৰাকৰ দাবী তুলিলেও বহু লোকে তেওঁৰ ওচৰলৈ গৈ পৃথক বৰাকৰ কথা নুশুনিবলৈ কয় আৰু বৰাকবাসীয়ে অসমৰ লগতে থাকিব বিচাৰে বুলিও কয়। গতিকে যিসকলে এই দাবী তুলিছে তেওঁলোকে প্ৰথমে বৰাকবাসীৰ মতামত লোৱা প্রয়োজন। মুখ্যমন্ত্ৰীগৰাকীয়ে কয়, ‘’বৰাকবাসীয়ে যদি সিদ্ধান্ত লয় আমি আলোচনা কৰিম।’
আনহাতে, মুখ্যমন্ত্ৰী হিমন্ত বিশ্ব শৰ্মাই সমষ্টি নিৰ্ধাৰণকলৈও প্ৰতিক্ৰিয়া ব্যক্ত কৰে। তেওঁ সমষ্টি পুনৰ নিৰ্ধাৰণক লৈ বৰাকবাসী সম্পূৰ্ণ সুখী বুলিও দাবী কৰে।
