গুৱাহাটী পৌৰ নিগমৰ নিৰ্বাচন!
এইবাৰ খেলপথাৰত নামিব মুখ্যমন্ত্ৰী ড০ হিমন্ত বিশ্ব শৰ্মা!
যিকোনো প্ৰকাৰে গুৱাহাটী পৌৰ নিগম দখলত ৰখাৰ আখৰাত কাইলৈৰ পৰা তিনিদিন প্ৰচাৰ সভাত অংশ ল’ব মুখ্যমন্ত্ৰীয়ে!
গুৱাহাটী পৌৰ নিগম বিজেপি মিত্ৰজোঁটে নিজৰ দখললৈ আনিবলৈ প্ৰত্যেক দিনাই ৰথী-মহাৰথীসকলে প্ৰচাৰ চলাই আহিছে। মন্ত্ৰী পিযুষ হাজৰিকা, বহু বিধায়ক তথা ৰাজ্যিক মহিলা মৰ্চাৰ সভানেত্ৰী আঙুৰলতা ডেকাই ঘৰে ঘৰে গৈ নিৰ্বাচনী প্ৰচাৰ চলোৱা দেখিবলৈ পোৱা গৈছে। ইফালে ৱাৰ্ডে ৱাৰ্ডে প্ৰাৰ্থী তথা বিজেপিৰ তৃণমূল কৰ্মীসকলে নিজৰ নিজৰ সদস্যসকলৰ হৈ প্ৰচাৰ চলাই আছে। কিন্তু ইয়াতো সন্তুষ্ট নহয় বিজেপি! পৰাজয়ৰ আশংকাই খেদি ফুৰিছে নেকি বিজেপিক? ভীতিগ্ৰস্ত হৈছে নেকি মুখ্যমন্ত্ৰী-ৰাজ্যিক সভাপতিৰ লগতে উচ্চস্তৰীয় নেতৃত্ব?
এই প্ৰশ্নৰ অৱতাৰণা এইবাবেই হৈছে যে মুখ্যমন্ত্ৰী নিজে নামিব গুৱাহাটী পৌৰ নিগমৰ প্ৰচাৰত।
কাইলৈৰ পৰা একেৰাহে তিনিদিন নিৰ্বাচনী প্ৰচাৰ চলাব মুখ্যমন্ত্ৰীয়ে।
১৭ এপ্ৰিলৰ বিয়লি ৩ বজাৰ পৰা আৰম্ভ হ’ব মুখ্যমন্ত্ৰীৰ প্ৰচাৰ সভা।
দেওবাৰে বিয়লি ৩ বজাত নাৰেঙ্গী; বিয়লি ৪ বজাত চান্দমাৰীৰ পেন্সন পাৰা, সন্ধিয়া ৫ বজাত গান্ধীবস্তিত, সন্ধ্যা ৬:৩০ বজাত গণেশপাৰাৰ চম্পাৱতী উচ্চ মাধ্যমিক বিদ্যালয় খেলপথাৰ।
ইয়াৰোপৰি, ১৮ এপ্ৰিলৰ দিনা বিয়লি ২ বজাত
খানাপাৰাৰ গণেশ মন্দিৰ আভ্যন্তৰীণ ক্ৰীড়া প্ৰাঙ্গণ, বিয়লি ৪ বজাত লালগণেশ, সন্ধ্যা ৫ বজাত পূৱ গুৱাহাটীত নিৰ্বাচনী প্ৰচাৰত অংশ ল’ব মুখ্যমন্ত্ৰীয়ে।
ঠিক সেইদৰে ১৯ এপ্ৰিলৰ বিয়লি ২ বজাত পশ্চিম গুৱাহাটীৰ ফৰেষ্ট গেটত অংশ লৈ বিয়লি ৩ বজাত জালুকবাৰীত নিৰ্বাচনী প্ৰচাৰ চলোৱাৰ অন্ত পৰিব মুখ্যমন্ত্ৰীৰ প্ৰচাৰ।
তাৎপৰ্য্যপূৰ্ণভাৱে ৩ দিনত ৯ খনকৈ নিৰ্বাচনী প্ৰচাৰ সভাত অংশ ল’ব মুখ্যমন্ত্ৰীয়ে।
প্ৰচাৰৰ সময়ত মুখ্যমন্ত্ৰীৰ লগত থাকিব ২-৩ গৰাকীকৈ মন্ত্ৰী-সাংসদ আৰু বিধায়ক।
পিছে মুখ্যমন্ত্ৰীৰ ইমানবোৰ নিৰ্বাচনী প্ৰচাৰ সভাৰ অৰ্থ কি?
প্ৰশ্ন হৈছে “বিজেপিয়ে গাই থকা বিকাশৰ জয়গানে
অন্তৰ চুব পৰা নাই নেকি গুৱাহাটীৰ ভোটাৰ ৰাইজৰ? নে পেট্ৰ’ল-ডিজেল আৰু অত্যাৱশ্যকীয় সামগ্ৰীৰ আকাশলঙ্ঘী মূল্যবৃদ্ধিয়ে প্ৰভাৱ পেলাব নেকি ভোটাৰ ৰাইজৰ মাজত?
মহানগৰীৰ খোৱাপানী-কৃত্ৰিম বানপানী, জাৱৰ নিষ্কাষণৰ সমস্যাৰ সমাধান আজিলৈকে নহ’ল। সেয়েহে চৰকাৰৰ ওপৰত ৰাইজৰ আস্থা ভংগ হৈছে নেকি?
২০০৯ চনৰে পৰা গুৱাহাটীবাসীয়ে বিশুদ্ধ খোৱাপানী যোগান ধৰাৰ নামত বৰ্তমানলৈকে চূড়ান্ত প্ৰহসনৰ সন্মুখীন হৈ আহিছে মহানগৰবাসী। তাৰোপৰি কৃত্ৰিম বানপানী, অপৰিষ্কাৰ নলা নৰ্দমা, ষ্ট্ৰীট লাইটৰ সমস্যাকে ধৰি অন্যান্য বহু সমস্যাৰে জৰ্জৰিত মহানগৰবাসী।
বিগত প্ৰায় ৬ টাকৈ বছৰ শাসনত থাকিও এইসমূহ সমস্যাৰ সমাধান কৰিব নোৱাৰাৰ বাবে নিশ্চয়কৈ শাসকীয় বিজেপি পৰাজয়ৰ আশংকাত ভোগাটো স্বাভাৱিক। সেয়েহে পৌৰ নিগমৰ নিৰ্বাচনতে ৰথী-মহাৰথী আনকি মুখ্যমন্ত্ৰীয়ে তিনিদিনত ৯ খনকৈ নিৰ্বাচনী প্ৰচাৰত অংশ লোৱাৰ পৰিস্থিতিৰ সৃষ্টি হৈছে।