দুমাহ সম্পূৰ্ণ কৰা হিচাপে মুখ্যমন্ত্ৰী ডঃ হিমন্ত বিশ্ব শৰ্মাৰ নেতৃত্বত অনুষ্ঠিত হোৱা বিশেষ কেবিনেটে এক চমকপ্ৰদ পৰিকল্পনা কৰা পৰিলক্ষিত হৈছে।
এইবাৰ জনজাতীয় লোকৰ বাবে এটা নতুন বিভাগৰ পৰিকল্পনা কৰিলে মুখ্যমন্ত্ৰী ড০ শৰ্মা কেবিনেটে।
অসম প্ৰশাসনীয় পদাধিকাৰী মহাবিদ্যালয়ত হোৱা এই কেবিনেট বৈঠকৰ অন্তত মুখ্যমন্ত্ৰীয়ে এক সংবাদমেল সম্বোধন কৰে।
উক্ত সংবাদমেলতে তেওঁ জনোৱা অনুসৰি অসমত খিলঞ্জীয়া লোকৰ ধৰ্মীয় পৰম্পৰা আৰু সংস্কৃতি বিভাগ (Department for Indigenous Faith and Culture) নামেৰে এটা নতুন বিভাগ গঠন কৰা হ’ব।
কেবিনেটৰ পিছত সম্বোধন কৰা সংবাদমেলত মুখ্যমন্ত্ৰী শৰ্মাই বৈঠকত লোৱা সিদ্ধান্ত সমূহ সদৰী কৰি নতুন বিভাগটো গঠনৰ পৰিকল্পনা কৰা বুলি ঘোষণা কৰে।
বিভিন্ন জনজাতীয় সম্প্ৰদায়ৰ পৰম্পৰা আৰু ঐতিহ্য সংৰক্ষণ আৰু সংবৰ্ধনৰ বাবেই এই বিভাগটো গঠনৰ সিদ্ধান্ত লোৱা হৈছে বুলি কয় শৰ্মাই।
ইপিনে, আজিৰ কেবিনেটতে অন্য কেতবোৰ গুৰুত্বপূৰ্ণ সিদ্ধান্ত লোৱা বুলি ঘোষণা কৰে মুখ্যমন্ত্ৰীয়ে।
তাৰ ভিতৰত তেওঁ জনোৱা অনুসৰি ২ কোটিৰ তলৰ আঁচনিত বিভাগীয় মন্ত্ৰীক অনুমোদন জনোৱাৰ কৰ্তৃত্ব প্ৰদান।
তাৰোপৰি প্ৰতি শুকুৰবাৰে ষ্টেণ্ডিং ফাইনেন্স কমিটীৰ বৈঠক অনুষ্ঠিত হ’ব বুলি তেওঁ জনায়।
৫ ৰ পৰা ১০০ কোটি টকা পৰ্যন্ত কোনো আঁচনিত এই ষ্টেণ্ডিং ফাইনেন্স কমিটীৰ অনুমোদনৰ কৰ্তৃত্ব লাভ কৰিব বুলিও তেওঁ জনায়।
আনহাতে আজিৰ এই কেবিনটতে মুখ্যমন্ত্ৰী ডঃ শৰ্মাই অহা ১৬ জুলাইত বিত্তমন্ত্ৰী অজন্তা নেওগক বাজেট দাখিলৰ আহ্বান জনায়।