মুখ্যমন্ত্ৰী ড০ হিমন্ত বিশ্ব শৰ্মাই আজি শক্তি বিভাগৰ মন্ত্ৰী বিমল বৰাৰ উপস্থিতিত বিভাগটোৰ বিষয়াসকলৰ সৈতে এক বৈঠকত মিলিত হৈ বিভাগটোৰ অধীনৰ তিনিওটা কোম্পানী ক্ৰমে এপিডিচিএল, এইজিচিএল আৰু এপিজিচিএলৰ কাম-কাজৰ পৰ্যালোচনা কৰে।
এই বৈঠকত মুখ্যমন্ত্ৰীয়ে প্ৰদান কৰে কেইবাটাও গুৰুত্বপূৰ্ণ নিৰ্দেশ।
* এক উন্নত বিলিং চিষ্টেম গঢ়ি কোম্পানীৰ লোকচান হ্ৰাস কৰিবৰ বাবে ৰাজ্যখনত ৬৩ লাখ উপভোক্তাৰ নাম, ফোন নম্বৰ ইত্যাদি সামৰি এক উপযুক্ত ডাটাবেচ তৈয়াৰ কৰাৰ নিৰ্দেশ৷
* কোম্পানীকেইটাক লাভজনক কোম্পানীৰূপে গঢ়ি তোলাৰ বাবে গুজৰাটৰ লেখীয়া প্ৰযুক্তিগত আৰ্হি গ্ৰহণৰ নিৰ্দেশ৷
* এপিডিচিএলৰ বিদ্যুৎ মিটাৰিঙৰ শুধৰণিৰ বাবে অহা মাহত চাব ডিভিজনেল ইঞ্জিনিয়াৰ পৰ্যায়ৰ বিষয়াসকলৰ সৈতে বৈঠকত মিলিত হ’ব মুখ্যমন্ত্ৰী৷
* কোম্পানীকেইটাৰ মাইক্ৰ’লেভেল পৰ্যায়ত পৰ্যালোচনা কৰি লোকচানৰ কাৰণসমূহ চিনাক্তকৰণ আৰু তাক শুধৰোৱাৰ নিৰ্দেশ৷
* কোম্পানীকেইটাক সম্পূৰ্ণ বৃত্তিগতভাৱে লাভজনক প্ৰতিষ্ঠানলৈ ৰূপান্তৰকৰণৰ পৰিকল্পনা যুগুত কৰাৰ নিৰ্দেশ৷
* কোম্পানীৰ ‘প্ৰফিট মেকিং চেণ্টাৰসমূহত ৫০০ টা ডিষ্ট্ৰিবিউচন ট্ৰেঞ্চফৰ্মাৰ তাৎক্ষণিকভাৱে স্থাপনৰ নিৰ্দেশ৷
* বিদ্যুৎ বিলৰ উপৰি এপিডিচিএলৰ অন্যান্য ৰাজহৰ উৎস বিলাক সঠিকভাৱে পৰিচালনা কৰাৰ নিৰ্দেশ৷
* বিদ্যুৎ ক্ৰয়ৰ দায়বদ্ধতা হ্ৰাস কৰাৰ নিৰ্দেশ৷ এই ক্ষেত্ৰত চৰকাৰী বিভাগসমূহৰ অনাদায় বিলসমূহ পূৰণৰ বাবে বাজেট ব্যৱস্থাপনা কৰাৰ নিৰ্দেশ৷
* চৰকাৰী কৰ্মচাৰীয়ে বিদ্যুৎ বিল নিদিয়াকৈ থাকিলে সংশ্লিষ্ট ডিডিঅ’সকলৰ জৰিয়তে কৰ্মচাৰীগৰাকীৰ দৰমহাৰ পৰা এই বিলৰ ধন কৰ্তনৰ ব্যৱস্থা কৰিবলৈ নিৰ্দেশ৷
* বিদ্যুৎ চুৰিৰ গোচৰসমূহ ৰুজু কৰাৰ বাবে পূৰ্বৰ কেইখনমান আৰক্ষী থানাৰ কতৃৰ্ত্ব থকাৰ বিপৰীতে এতিয়াৰ পৰা সকলোবোৰ আৰক্ষী থানাকে এপিডিচিএল আৰক্ষী থানা হিচাপে ঘোষণা কৰাৰ জাননী জাৰি কৰিবলৈ নিৰ্দেশ৷
* তিনিওটা কোম্পানীয়ে ২০২১ চনৰ ৩১ মাৰ্চলৈকে চৰকাৰৰ পৰা গ্ৰহণ কৰা ঋণ আৰু ইয়াৰ সুদক তাৎক্ষণিকভাৱে অংশীদাৰিত্বলৈ ৰূপান্তৰকৰণ আৰু ইয়াৰ পৰৱৰ্তী সময়ত এই অংশীদাৰিত্বৰ বিপৰীতে প্ৰাপ্য লাভালাভ প্ৰদান সম্বন্ধীয় এক জাননী অতি সোনকালে জাৰি কৰাৰ বাবে বিত্ত বিভাগৰ প্ৰধান সচিব সমীৰ কুমাৰ সিনহাক নিৰ্দেশ৷
* এইজিচিএলৰ ‘আছাম ইন্ট্ৰা ট্ৰেঞ্চমিচন চিষ্টেম এনহেঞ্চমেণ্ট’ প্ৰকল্পৰ দ্বিতীয় পৰ্যায় আৰম্ভ কৰাৰ আগতে এক নিৰপেক্ষ সমিতিৰ দ্বাৰা ভালদৰে অধ্যয়ন কৰাৰ পদক্ষেপ ল’বলৈ নিৰ্দেশ৷
* বৰ্তমানৰ চৰকাৰৰ কাৰ্যকালৰ ভিতৰতে শক্তি বিভাগৰ আটাইকেইটা কোম্পানীকে গুজৰাটৰ লেখীয়া প্ৰযুক্তিগতভাৱে তথা লাভজনকভাৱে সমপৰ্যায়ৰ কোম্পানীলৈ ৰূপান্তৰকৰণৰ পদক্ষেপ ল’বলৈ নিৰ্দেশ ৷