আজিৰ পৰা কেইদিনমান পূৰ্বে গোলাঘাট আৰু যোৰহাট জিলাৰ বিভিন্ন অঞ্চলত লালিগুৰৰ পৰা প্ৰস্তুত কৰা বিষাক্ত সুৰা সেৱন কৰি ডেৰ শতাধিক লোকৰো অধিক লোকে প্ৰাণ হেৰুওৱাক কেন্দ্ৰ কৰি ৰাজ্যৰ সৰ্বত্ৰে তীব্ৰ প্ৰতিক্ৰিয়া হৈ থকাৰ প্ৰতি লক্ষ্য ৰাখি ৰাজ্যত লালিগুৰ নিষিদ্ধ কৰিবলৈ মুখ্য মন্ত্ৰীয়ে জিলা উপায়ুক্তসকলক নিৰ্দেশ দিয়ে।
আজি জনতা ভৱনৰ মুখ্য মন্ত্ৰীৰ সভাকক্ষত ৰাজ্যৰ চাহ বাগিচা সমূহৰ বিষয়ৰ ওপৰত পৰ্যালোচনা কৰাৰ বাবে অনুষ্ঠিত হোৱা বৈঠকত এই নিৰ্দেশ দিয়ে মুখ্য মন্ত্ৰী সোণোৱালে।
বৈঠকত মুখ্য মন্ত্ৰী সোণোৱালে চাহ বাগিচা অধ্যুষিত এলেকা সমূহৰ সংশ্লিষ্ট উপায়ুক্তসকলক অবৈধ সুৰাৰ ব্যৱহাৰ আৰু সেৱনৰ ক্ষতিকাৰক দিশ সমূহৰ বিষয়ে জনসচেতনতা সৃষ্টিৰ বাবে উপযুক্ত পদক্ষেপ ল’বলৈও নিৰ্দেশ দিয়ে।
ইয়াৰ উপৰি জনসচেতনতামূলক কাৰ্যসূচী সমূহত বিভাগীয় মন্ত্ৰী, জনপ্ৰতিনিধিকে ধৰি বিভিন্ন সংগঠনসমূহক জড়িত কৰোৱাৰ ব্যৱস্থা ল’বলৈও নিৰ্দেশ দিয়ে। প্ৰয়োজন সাপেক্ষে মুখ্য মন্ত্ৰী নিজে উপস্থিত থাকিব বুলিও কয়।
বিষাক্ত সুৰা সেৱন কৰি মৃত্যু হোৱা লোকসকলৰ ঘাতমাউৰা শিশুসকলক জুভেনাইল জাষ্টিচ আইনৰ অধীনত ৰাজ্য চৰকাৰৰ তৰফৰ পৰা প্ৰতিপালন কৰাৰ ব্যৱস্থা লোৱা হ’ব বুলিও বৈঠকত সিদ্ধান্ত গ্ৰহণ কৰে।
আজিৰ এই বৈঠকত চাহ জনজাতি কল্যাণ বিভাগৰ মন্ত্ৰী পল্লব লোচন দাস, মুখ্য মন্ত্ৰীৰ আইন উপদেষ্টা শান্তনু ভৰালী, মুখ্য সচিব আলোক কুমাৰ, শ্ৰম বিভাগৰ দায়িত্বত থকা অতিৰিক্ত মুখ্য সচিব জিষ্ণু বৰুৱা, মুখ্য মন্ত্ৰীৰ প্ৰধান সচিবৰ লগতে ৰাজহ, আবকাৰী, শ্ৰম বিভাগৰ উচ্চপদস্থ বিষয়াসকল উপস্থিত থাকে।
