শুকুৰবাৰে খানাপাৰাস্থিত পশু চিকিৎসা বিজ্ঞান মহাবিদ্যালয় খেলপথাৰত ৰাজ্য চৰকাৰৰ গৃহ বিভাগ আৰু অসম আৰক্ষীৰ উদ্যোগত আয়োজিত অনুষ্ঠানত মুখ্য অতিথি হিচাপে উপস্থিত থাকি অসম আৰক্ষীৰ সশস্ত্ৰ শাখাৰ ১৩৭৩গৰাকী নৱনিযুক্ত কনিষ্টবলক আনুষ্ঠানিকভাৱে নিযুক্তিপত্ৰ বিতৰণ কৰে মুখ্যমন্ত্ৰী সৰ্বানন্দ সোণোৱালে।
শুকুৰবাৰে নিযুক্তিপ্ৰাপ্ত সৰ্বমুঠ ১৩৭৩গৰাকী কনিষ্টবলৰ ভিতৰত ১৩০গৰাকী মহিলাই নিযুক্তি লাভ কৰিছে।
অনুষ্ঠানত ভাষণ প্ৰদান কৰি মুখ্যমন্ত্ৰী সোণোৱালে কয়, ‘‘বৰ্তমানৰ ৰাজ্য চৰকাৰখনে ৰাজ্যখনৰ ৩.৩০ কোটি জনসাধাৰণৰ জীৱন আৰু সম্পত্তিৰ সুৰক্ষাৰ লগতে সকলো শ্ৰেণীৰ জনসাধাৰণৰ মৰ্যাদা অক্ষুণ্ণ ৰখা আৰু সম উন্নয়নৰ লক্ষ্যৰে আৰম্ভণিৰে পৰা নিষ্ঠা সহকাৰে কৰ্মত অৱতীৰ্ণ হৈ আহিছে। অসম আৰক্ষীৰ প্ৰতিগৰাকী বিষয়া-জোৱানেও জনসাধাৰণৰ সুৰক্ষা, আইন –শৃংখলা বজাই ৰাখি শান্তিপূৰ্ণ পৰিৱেশ অটুট ৰখাৰ ক্ষেত্ৰত জাগ্ৰত প্ৰহৰীৰ ভূমিকা পালন কৰিব লাগিব।‘’
সোণোৱালে বর্তমানৰ চৰকাৰৰ দিনত একমাত্ৰ যোগ্যতাৰ ভিত্তিত তথা স্বচ্ছ প্ৰক্ৰিয়াৰে নিযুক্তিপত্ৰ প্ৰদান কৰা হৈছে বুলি উল্লেখ কৰি কয় যে কিছু মাহৰ আগতে ২৫০০গৰাকী আৰক্ষী কনিষ্টবলক নিযুক্তি প্ৰদান কৰাৰ উপৰি অসম আৰক্ষীৰ বিভিন্ন পদবীৰ ৬০০০টা পদত নিযুক্তিৰ প্ৰক্ৰিয়া চলাই থকা হৈছে।
আনহাতে, গুৱাহাটীত আয়োজিত ডি জি পি সন্মিলনত প্ৰধানমন্ত্ৰী নৰেন্দ্ৰ মোদীয়ে স্মাৰ্ট পুলিচ গঢ়াৰ ওপৰত গুৰুত্ব আৰোপ কৰাৰ বিষয়ে উল্লেখ কৰি অসম আৰক্ষীয়ে প্ৰধানমন্ত্ৰীৰ এই লক্ষ্য পূৰণৰ বাবে তেওঁলোকৰ কৰ্মৰ জৰিয়তে স্মাৰ্ট পুলিচ হিচাপে নিজকে গঢ়ি তোলাৰ দিশত নিষ্ঠা সহকাৰে কৰ্তব্যত অৱতীৰ্ণ হ’ব লাগিব বুলিও মুখ্যমন্ত্ৰীয়ে কয়।
ভাষণ প্ৰসংগত মুখ্যমন্ত্ৰীয়ে ৰাজ্য চৰকাৰৰ ৫ লাখ বিষয়া-কৰ্মচাৰীয়ে ঐক্যবদ্ধভাৱে তথা সেৱাৰ মনোভাৱেৰে কৰ্মত অৱতীৰ্ণ হ’লে ৰাজ্যখন বহুদূৰ আগুৱাই যাব বুলি ব্যক্ত কৰে।
অনুষ্ঠানত অসম আৰক্ষীৰ নিযুক্তি প্ৰক্ৰিয়াত সম্পূৰ্ণ স্বচ্ছতা বজাই ৰখাৰ বিষয় সম্বলিত এখন চুটি ছবিও প্ৰদৰ্শন কৰা হয়।