ফলাফল ঘোষণা হোৱাৰ ৫ দিনৰ পাছত অৰ্থ্যাৎ যোৱা ২ মে’ৰ পৰা আজি পোনপ্ৰথমবাৰলৈ খাৰঘুলিৰ পাহাৰস্থিত ব্ৰহ্মপুত্ৰ অতিথিশালাৰ পৰা নামি আহিল মুখ্যমন্ত্ৰী সৰ্বানন্দ সোণোৱাল।
পাহাৰৰ পৰা নামি আহিয়েই পোনে পোনে সৰুসজাইস্থিত কোভিড কেয়াৰ চেন্টাৰ পৰিদৰ্শন কৰে মুখ্যমন্ত্ৰী সৰ্বানন্দ সোণোৱালে।
চেন্টাৰ পৰিদৰ্শন কৰি সোণোৱালে সংবাদ মাধ্যমৰ আগত মুখ্যমন্ত্ৰীকেন্দ্ৰিক চৰ্চাক লৈ সাংবাদিকে সোধা প্ৰশ্নৰ উত্তৰত কয় ‘মুখ্যমন্ত্ৰীটো ডাঙৰ কথা নহয়, কোভিড সংক্ৰমণৰ পৰা জনতাক ৰক্ষা কৰাটোহে আটাইতকৈ ডাঙৰ কথা হৈছে। সকলোৱে দায়ৱদ্ধতাৰে আমাৰ কামখিনি কৰি যাব লাগিব। ‘বৰাক-ব্ৰহ্মপুত্ৰ-পাহাৰ ভৈয়াম সকলোৱে দৃঢ়তাৰে যুঁজ দিব।ক’ৰ’না ভাইৰাছৰ বিৰুদ্ধে যুঁজ দি সফল হ’বই লাগিব আৰু অসমৰ ৰাইজক নিৰোগী আৰু স্বাস্থ্যবান কৰি ৰাখিবই লাগিব।‘ সোণোৱালে লগতে কয়।
ইপিনে, সাংবাদিকে পুনৰ চৰকাৰ কেতিয়া গঠন হ’ব বুলি সোধাত সোণোৱালে কয় ‘চৰকাৰ হ’বই, নিশ্চিতভাৱে হ’ব, আৰু বেছি দিন নহয়। কিন্তু এই মুহূৰ্তৰ যিটো মানৱীয় দায়িত্ব আৰু কৰ্তব্য হৈছে অসমৰ ৰাইজক এই ভাইৰাছৰ পৰা ৰক্ষা কৰা।‘
‘দুই এদিনতে সংসদীয় পৰিক্ৰমা ব’ৰ্ডৰ বৈঠক হ’ব আৰু এই বৈঠকেই চুড়ান্ত সিদ্ধান্ত ল’ব। আপোনালোকে সেইটোক লৈ চিন্তা কৰিব নালাগে।‘ সোণোৱালে এইদৰে কয়।
আনহাতে, ৰাজ্যৰ স্বাস্থ্য বিভাগ কোভিড-১৯ ৰ বিৰুদ্ধে নিষ্ঠাৰে যুদ্ধত লিপ্ত হৈছে বুলি উল্লেখ কৰি সোণোৱালে লগতে কয় ‘পৰিস্থিতি ভয়াবহ হৈছে কিন্তু নিয়ন্ত্ৰণ কৰিব লাগিব। নিয়ন্ত্ৰণ কৰিবলৈ হ’লে সকলো শ্ৰেণীৰ ৰাইজৰ সহযোগিতা লাগিব। স্বাস্থ্য বিভাগৰ তৰফৰ পৰা যিখিনি নিৰ্দেশনা দিছে সেইখিনি মানি চলিবই লাগিব, ইয়াৰ কোনো বিকল্প নাই।‘
তেওঁ আৰু কয় ‘পৰিস্থিতি সেই পৰ্য্যায়লৈ যাব নালাগে যিটো পৰ্য্যায়ত লকডাউনৰ কথা আহিব পাৰে। স্বাস্থ্যমন্ত্ৰী হিমন্ত বিশ্ব শৰ্মাই দিনে নিশাই এইক্ষেত্ৰত কষ্ট কৰি চোৱা-চিতা কৰি আছে।‘
