‘তেওঁ হিন্দু বাংলাদেশী খিনিকো অসমীয়া বুলি ভাবি থাকে নেকি? মই ভাবো আজিৰ তাৰিখত সৰ্বানন্দ সোণোৱালে অসমীয়া সংজ্ঞাটোও পৰিষ্কাৰকৈ নাজানে।‘
মুখ্য মন্ত্ৰী সৰ্বানন্দ সোণোৱালে দোহাৰি থকা ‘অসমীয়া জাতিৰ স্বাৰ্থ বিঘ্নিত হোৱা কোনো কামেই নকৰো’– উক্ত কথাষাৰৰ প্ৰসংগত নৰ্থ ইষ্ট নাও-ৰ সৈতে হোৱা কথা-বতৰাত আলফা নেতা জিতেন দত্তই এইদৰে কয়।
দত্তই লগতে কয় ‘তেওঁ অসমীয়াৰ সংজ্ঞাটো পৰিষ্কাৰকৈ জনাহেঁতেন ইমানখিনি সংগঠনে বন্ধৰ আহ্বান জনোৱাৰ পাছত তেওঁ অলপ উপলব্ধি কৰিলেহেঁতেন।‘
আনহাতে, বৰঞ্চ মুখ্য মন্ত্ৰী সৰ্বানন্দ সোণোৱালে জোৰদাৰ প্ৰক্ৰিয়াৰে বন্ধটো বিফল কৰিবলৈ চেষ্টা কৰা দেখিবলৈ পোৱা গ’ল বুলি জিতেন দত্তই আমাৰ আগত কয়।
তদুপৰি উজনি অসমত বিশেষকৈ তিনিচুকীয়া, ডিব্ৰুগড় জিলাত অসম বন্ধ যথেষ্ট সফল হৈছে বুলি দত্তই নৰ্থ ইষ্ট নাও-ক জনায়।
তেওঁ লগতে কয় ‘পূৰ্বতে বন্ধ দিলে কোনে বন্ধ দিছে সেইটোও গম নাপায়, কিন্তু আজিৰ এই বন্ধটোত স্বতঃস্ফূৰ্তভাৱে যুৱকসকল ৰাজপথলৈ ওলাই আহিছে। আজি কোনো দল বুলি নহয়, অসমীয়া বুলি ভবা প্ৰতিজনেই আজি ওলাই আহিছে।‘
আনহাতে, আজিৰ অসম বন্ধটো চৰকাৰৰ কাৰণে অসমীয়া খিলঞ্জীয়া লোকৰ এটা চূড়ান্ত সকীয়নি বুলি দাবী কৰি দত্তই লগতে কয়, ‘সেই সকীয়নি যদি চৰকাৰে বুজিবলৈ চেষ্টা কৰে, তেন্তে ভৱিষ্যতলৈ ভৰিৰ তলৰ মাটিখিনি থাকিব আৰু বুজিবলৈ চেষ্টা নকৰিলে চৰকাৰৰ ভৰিৰ তলৰ মাটিখিনিও খহি যাব।‘
উল্লেখযোগ্য যে, আজি বন্ধৰ সময়খিনিৰ মাজতে নাগৰিকত্ব সংশোধনী বিধেয়কৰ বিৰুদ্ধে ডিগবৈ, তিনিচুকীয়া ইত্যাদি অঞ্চলসমূহত জিতেন দত্তৰ নেতৃত্বত শতাধিক যুৱকে ৰাজপথত বাইক ৰেলি বাহিৰ কৰে।
