প্ৰথম নিৰ্বাচনতে জয়লাভ কৰিছে তেওঁৰ দল ‘টিভিকে’। তামিলনাডুৰ মুখ্যমন্ত্ৰী হোৱাৰ পিছতে ভোটাৰক ধন্যবাদ জনাবলৈ ৰাজহুৱাকৈ ওলাই আহিল নতুন মুখ্যমন্ত্ৰী চি জোচেফ বিজয়। মুখ্যমন্ত্ৰী হিচাপে এয়া তেওঁৰ প্ৰথম ‘ধন্যবাদ ভাষণ’। বিজয়ৰ অভাৱনীয় বিজয়ে বহু ৰাজনৈতিক বিশ্লেষকক আচৰিত কৰি তুলিছে।তেওঁৰ সফলতাৰ ফলতে এম কে ষ্টেলিনৰ ডি এম কে চৰকাৰৰ পতন ঘটে।
সোমবাৰে সন্ধিয়া তিৰুচিৰাপল্লীত ভৰি দিয়ে বিজয়ে। ২০১৫ চনৰ ছেপ্টেম্বৰ মাহত তিৰুচিৰাপল্লীৰ পৰা নিৰ্বাচনী প্ৰচাৰ আৰম্ভ কৰিছিল। আজি বিমানবন্দৰৰ পৰা ওলাই অহাৰ লগে লগে তেওঁক ঘেৰি ধৰিলে জনতাই।
“বিজয়! বিজয়!” এই শ্লোগানে চৌপাশ কঁপাই তুলিলে। ইয়াৰ পিছত তাৰ পৰাই ৰোড শ্ব’ত অংশ লয়। ৰাইজৰ বিপুল হাতচাপৰিৰ মাজতে মুখ্যমন্ত্ৰীয়ে মাত্ৰ এটা শব্দৰে ভাষণ আৰম্ভ কৰিলে – “ধন্যবাদ।”
ডি এম কে আৰু এ আই এ ডি এম কেৰ দৰে সুপৰিচিত ৰাজনৈতিক দললৈ আঙুলিয়াই বিজয়ে কয় যে, “ইমান বছৰে আপোনালোকক প্ৰতাৰণা কৰাসকলক আপোনালোকে নাকচ কৰিছে। আপোনালোকে মোক জয়ী কৰিছে। তাৰ বাবে মই আপোনালোকৰ ওচৰত কৃতজ্ঞতাৰে মূৰ নত কৰিছো।”
নিৰ্বাচনত একক সংখ্যাগৰিষ্ঠতা লাভ কৰিব নোৱাৰাত বিজয়ে এতিয়া মিত্ৰজোঁটৰ চৰকাৰ চলাই আছে। তেওঁ নিজৰ সমৰ্থকসকলক অকপটে কয় যে যদি তেওঁৰ দলে আৰু কেইখনমান আসন লাভ কৰিলেহেঁতেন তেন্তে কাম কৰাটো বহুত সহজ হ’লহেঁতেন। অৱশ্যে ভৱিষ্যতক লৈ তেওঁ আত্মবিশ্বাসী। বিজয়ৰ ভাষাত, “মই নিশ্চিত যে অনাগত দিনত আপোনালোক সকলোৰে সমৰ্থন পাম। মই কেনেকৈ কাম কৰো সেয়া চালে আপোনালোকে মোৰ শলাগ ল’ব।”
চৰকাৰী অনুষ্ঠানত চুট পিন্ধা বুলি বিৰোধীয়ে কৰা কটাক্ষৰো প্ৰত্যুত্তৰ দিয়ে অভিনেতা-ৰাজনীতিবিদগৰাকীয়ে। বিজয়ে কয়, “মোৰ চুটৰ ৰং সদায় ক’লা-বগা। ইয়াৰ এটা অৰ্থ আছে। মই সকলো চকুৰে স্পষ্টকৈ দেখো। ভাল বেয়াৰ মাজত মোৰ আপোচৰ কোনো স্থান নাই।”
নতুন মুখ্যমন্ত্ৰীক আদৰণি জনাই বিমানবন্দৰত উপস্থিত আছিল মন্ত্ৰী আধৱ অৰ্জুন, এছ ৰমেশ আৰু লোকসভাৰ সাংসদ দুৰাই ভাইকো। এই বিশাল জাকজমকীয়া ৰোডশ্ব’টোৱে বিমানবন্দৰৰ পৰা ছেইণ্ট জোচেফ কলেজলৈকে প্ৰায় ১০ কিলোমিটাৰ দূৰত্ব অতিক্ৰম কৰিছিল।
ভোটাৰক ধন্যবাদ জনোৱাৰ বাবে তিৰুচিৰাপল্লী বাছি লোৱাৰ এটা ডাঙৰ কাৰণ আছে। তাত থকা ‘তিৰুচিৰাপল্লী ইষ্ট’ সমষ্টিৰ ৰাইজে তেওঁক ভোটদান কৰি বিপুল ব্যৱধানত জয়ী কৰে। এইবাৰ বিজয়ে দুখন আসনৰ পৰা জয়লাভ কৰিছে। আনখন আসন আছিল চেন্নাইৰ পেৰাম্বুৰ। অৱশ্যে নতুন মুখ্যমন্ত্রীয়ে তিৰুচিৰাপল্লী ইষ্টৰ আসনখন ত্যাগ কৰি নিয়ম অনুসৰি পেৰাম্বুৰ আসনখন নিজৰ বাবে ৰখাৰ সিদ্ধান্ত লয়৷
