আমেৰিকাত ক’ৰ’ণা ভাইৰাছে সংহাৰৰ সৃষ্টি কৰাৰ সময়ৰে পৰাই মন-মেজাজ ভাল নহ’য় মাৰ্কিন ৰাষ্ট্ৰপতি ডোনাল্ড ট্ৰাম্পৰ।
ক’ৰ’ণা ভাইৰাছক লৈ ট্ৰাম্পে কয় কিবা এটা,বিশ্ব স্বাস্থ্য সংস্থাই কয় আন কিবা এটা।
ইপিনে বিৰোধীৰ হেঁচাতো আছেই । এনে পৰিস্থিতিত অলপ কথাতেই খং উঠা হৈছে ট্ৰাম্পৰ।
শেহতীয়াকৈ ট্ৰাম্পে আয়োজন কৰে এখন সংবাদ মেল। ক’ৰ’ণাৰ সংক্ৰমণ সন্দৰ্ভত আয়োজন কৰা সংবাদমেল খনত বিশ্বৰ বিখ্যাত সংবাদ প্ৰতিষ্ঠান সমূহৰ সাংবাদিক উপস্থিত আছিল।
ট্ৰাম্পে সাংবাদিকৰ সকলো প্ৰশ্নৰ উত্তৰ দি গৈছিল যদিও চি এন এনৰ সাংবাদিকে সোধা এটা প্ৰশ্নত ট্ৰাম্প জাঙুৰ খাই উঠিল।
চি এন এনৰ সাংবাদিক কাইলান কলিন্সে ট্ৰাম্পক হাইড্ৰক্সি ক্ল’ৰ’কুইন টেবলেটৰ কাৰ্যকাৰিতাৰ বিষয়ে প্ৰশ্ন কৰাৰ লগে লগে ট্ৰাম্প খঙত একো নাই হৈ পৰিল।
তেওঁ লগে লগে সংবাদমেল আধাতে সামৰি উঠি গুচি গ’ল।
বিগত কিছু দিনত ট্ৰাম্পক আটাইতকৈ আমনি কৰা বিষয়টোৱেই হৈছে হাইড্ৰক্সি ক্ল’ৰ’কুইন টেবলেটৰ প্ৰসংগ।
ট্ৰাম্পে এই দৰৱ বিধ ভাল বুলি কোৱাৰ বিপৰীতে খোদ মাৰ্কিন স্বাস্থ্য বিভাগেই দৰৱ বিধৰ কোনো কাম নাই বুলি কৈ আহিছে।
ইমানৰ পিছতো ট্ৰাম্পে নিজৰ স্থিতিৰ পৰা আঁতৰি যোৱা নাই।
সেই একেটা বিৰক্তিকৰ বিষয়েই সংবাদিকে উত্থাপন কৰাত খং উঠিল ট্ৰাম্পৰ।