সাধাৰণতে নিজা সাজোন কাচোনেৰে সুন্দৰী সকল সৌন্দৰ্য্য প্ৰতিযোগিতালৈ আহে। পিচে, এইবাৰ ৰেম্পত আৰ্কষণীয় বেশভূষাৰে সজাই পৰাই অনা হ’ল চহা ৰাইজৰ বুকুৰ আপোন গো ধনক। কৃষক আৰু গো পালকে নিজেই ৰেম্পলৈ লৈ আনিলে গো ধনক। এই ব্যতিক্ৰমী গৰুৰ ফেশ্যন শ্বো অনুষ্ঠিত হৈছে বজালীত।
এয়াও আছিল এক সৌন্দৰ্য্য প্ৰতিযোগিতা। ৰেম্পত কৃষকৰ কাষতে থিয় হৈছে গো ধন। বিগত বাৰ বছৰ ধৰি বজালীৰ ঐতিহ্য পূৰ্ণ গোবিন্দপুৰ সত্ৰৰ চৌহদত অনুষ্ঠিত কৰি অহা হৈছে এই প্ৰতিযোগিতাৰ।
মূলত: কৃষক ৰাইজ আৰু গো পালক সকলক উৎসাহ যোগোৱাৰ উদ্দেশ্যে গৰু বিহুৰ দিনাখন আয়োয়োজন কৰা হয় এই ব্যতিক্ৰমী প্ৰতিযোগিতাখনৰ।পুৱাতে মা হালধীৰে নোৱাই-ধোৱাই লোৱা গো ধনক পাট মুগা বৰণীয়া বিহুৱান, লাও বেঙেনাৰে তথা পৰম্পৰাগত অসমীয়া সম্পদৰে সজাই পৰাই অনা হয় ৰেম্পলৈ। আনহাতে, ধূতি,গামোচা,নাঙল,যুঁৱলি ,গৰু গাড়ী আদি বিভিন্ন সম্ভাৰেৰে ৰেম্প সজোৱা হয়।
ৰাজ্যৰ ভিতৰতৰ প্ৰথম খন গৰুৰ ফেশ্যন শ্বো বুলি পৰিচিত অনুষ্ঠানটিত অঞ্চলটোৰ ৰাইজৰ লগতে দূৰদূৰণিৰ ৰাইজে ভিৰ কৰে। ইপিনে,বিহু হুচৰিৰে গো ধনক আদৰি অনা হয়।
