এয়া যেন অক্ষয় কুমাৰ অভিনীত ‘গব্বৰ’ চিনেমাখনৰ প্ৰতিচ্ছবি! তাত দেখুওৱা হৈছিল যে কেনেকৈ চিকিৎসক আৰু চিকিৎসালয়ৰ কৰ্মচাৰীয়ে এজন মৃত ৰোগীৰ চিকিৎসাৰ নামত তেওঁৰ পৰিয়ালৰ পৰা ধন লৈছিল। বাস্তৱত মধ্যপ্ৰদেশতো একেই ঘটনা ঘটিল! নাই, ইয়াত ৰোগীৰ মৃত্যু হোৱা নাই। বৰঞ্চ তেওঁক আই চি ইউত আৱদ্ধ কৰ ৰাখি ধন ঘটাৰ অভিযোগ উত্থাপন হৈছে।
মধ্যপ্ৰদেশৰ ৰাতলামৰ এখন চিকিৎসালয়ৰ বিৰুদ্ধে এজন যুৱকে আনিছে এই বৃহৎ অভিযোগ। তেওঁ দাবী কৰে যে তেওঁক কেইবাদিনো আই চি ইউত ঔষধ খুৱাই ৰখা হৈছিল। বাহিৰলৈ ওলাই যাবলৈ বা কাকো লগ কৰিবলৈ দিয়া হোৱা নাছিল। পৰিয়ালটোক কোৱা হয় যে তেওঁ ‘ক’মা’ত আছে! কিন্তু অৱশেষত কেনেবাকৈ তেওঁ চিকিৎসালয়ৰ পৰা ওলাই আহিবলৈ সক্ষম হ’ল। ইতিমধ্যে ছ’চিয়েল মিডিয়াত ভাইৰেল হৈ পৰিছে যুৱকজনৰ ভিডিঅ’।
কাজিয়াৰ সময়ত বান্টী নামৰ যুৱকজন আহত হৈছিল। তাৰ পিছত তেওঁক চিকিৎসালয়ত ভৰ্তি কৰা হয়। কিন্তু অভিযোগটো হ’ল তেওঁক প্ৰায়ে ঔষধ খুৱাই শুৱাই ৰখা হৈছিল। ইফালে চিকিৎসালয় কৰ্তৃপক্ষই পৰিয়ালটোৰ পৰা লৈছিল হাজাৰ হাজাৰ টকা। বাণ্টীৰ পৰিয়ালে জনোৱা মতে, ইতিমধ্যে তেওঁলোকৰ পৰা ১ লাখ টকা লোৱা হৈছে। কোৱা হৈছিল যে বাণ্টীয়ে মেৰুদণ্ডৰ গুৰুতৰ আঘাত পাইছে আৰু ক’মাত গুচি গৈছে!
ছ’চিয়েল মিডিয়াত ভাইৰেল হৈছে বাণ্টীৰ এটা ভিডিঅ’, য’ত দেখা গৈছে যে তেওঁৰ হাতত একাধিক টিউব সংলগ্ন হৈ আছে আৰু ৰাস্তাত তেওঁ চিঞৰিছে। বাণ্টী একেবাৰেই গুৰুতৰভাৱে অসুস্থ যেন নালাগে। বাণ্টীয়ে দাবী কৰে যে তেওঁক দিনৰ পিছত দিন ‘বন্দী’ কৰি ৰখা হৈছিল আৰু পৰিয়ালৰ পৰা দাবী কৰি ধন লোৱা হৈছিল। তেওঁৰ অভিযোগ মূলতঃ ৫জন চিকিৎসালয়ৰ কৰ্মচাৰীৰ বিৰুদ্ধে।
বাণ্টীৰ পত্নীয়ে কয় যে তেওঁলোকে খৰচ বহন কৰোতে সঞ্চিত ধন শেষ হৈছে। স্বামীৰ চিকিৎসাৰ বাবে আত্মীয়ৰ পৰা ধাৰ ল’বলৈ আৰম্ভ কৰিছিল। কিন্তু এতিয়া গম পাইছে যে এই সকলোবোৰ মিছা। কিন্তু বাণ্টী কেনেকৈ পলাই গ’ল? ভিডিঅ’টোত তেওঁ চিকিৎসালয়ৰ কৰ্মী এজনক কেঁচিৰে ভাবুকি দিয়া দেখা গৈছে। তাৰ পিছতে তেওঁক এৰি দিয়া হয়।
