কংগ্ৰেছৰ দুৰ্নীতিৰ প্ৰসঙ্গক মূল আধাৰ কৰি দুৰ্নীতি শূন্যৰ প্ৰতিশ্ৰুতিৰে দেশৰ শাসনলৈ অহা বিজেপি দলৰ নেতাৰ বাবে ১৫ টকাৰ তলৰ বিত্তীয় খেলিমেলিক দুৰ্নীতিৰ আখ্যা দিয়া নহয়। ১৫ লাখ টকাৰ অধিক পৰিমাণৰ দুৰ্নীতি হ’লেহে সেয়া দুৰ্নীতিৰ শাৰীত ধৰা হ’ব।
এইয়া কোনো অভিযোগ নহয়। খোদ বিজেপিৰ এজন সাংসদেই এই কথা কৈছে। মধ্য প্ৰদেশৰ ৰেৱা লোকসভা সমষ্টিৰ বিজেপি সাংসদ জনাৰ্দন মিশ্ৰাই কয় যে যদি এজন ব্যক্তিৰ বিৰুদ্ধে ১৫ লাখ টকাৰ অধিক পৰিমাণৰ দুৰ্নীতিৰ অভিযোগ উত্থাপিত হয় তেতিয়াহে তেওঁৰ কাষ চাপিব লাগে।
অনলাইনত ভাইৰেল হোৱা এটা ভিডিঅ’ত বিজেপি সাংসদগৰাকীয়ে কোৱা শুনা গৈছে, “যেতিয়া মানুহে এজন চৰপঞ্চৰ ওপৰত দুৰ্নীতিৰ অভিযোগ উত্থাপন কৰে, মই তেওঁলোকক কওঁ যে যদি দুৰ্নীতি ১৫ লাখ টকালৈকে হয় তেন্তে মোৰ ওচৰলৈ আহিব নালাগে। কেৱল তেতিয়াহে আহক যদি দুৰ্নীতি ১৫ লাখ টকাৰ অধিক হয়।”
এখন আলোচনাচক্ৰত ভাষণ দি তেওঁ কয় যে চৰপঞ্চসকলৰ দুৰ্নীতি সম্পৰ্কীয় উদ্বেগৰ সৈতে লোকসকল বৃহৎ সংখ্যাত তেওঁৰ ওচৰলৈ আহে। মিশ্ৰাই কয় যে প্ৰাৰ্থীজনে “নিৰ্বাচনত প্ৰতিদ্বন্দিতা কৰিবলৈ প্ৰথম ৭ লাখ টকা, পৰৱৰ্তী নিৰ্বাচনৰ বাবে পৰৱৰ্তী ৭ লাখ টকা আৰু বৰ্ধিত মুদ্ৰাস্ফীতিৰ প্ৰতি লক্ষ্য ৰাখি ১ লাখ টকা ব্যয় কৰে”।
অৰ্থাৎ তেওঁৰ ভাষ্য অনুসৰি নিৰ্বাচনী ব্যয়ৰ ধনৰাশি সংগ্ৰহ কৰিবলৈ ১৫ লাখ টকাৰ দুৰ্নীতি কৰাটো এক প্ৰাসঙ্গিক প্ৰক্ৰিয়া।
