ৰাজ্যৰ শিক্ষানীতিৰ নতুন সংযোজন অনুসৰি ২০২০ চনৰ পৰা নৱম শ্ৰেণীত ঐচ্ছিক বিষয় হিচাপে বাণিজ্যক সংযোজন কৰা হ’ব।
গুৱাহাটী বাণিজ্য মহাবিদ্যালয়ত অসম মাধ্যমিক শিক্ষা পৰিষদে অনুষ্ঠিত কৰা এক অনুষ্ঠানত বাণিজ্যিক বিষয়ৰ ‘এন ইণ্ট্ৰোডাকশ্যন উইথ কমাৰ্চ’ নামৰ পাঠ্যপুথি খন উন্মোচন কৰা হয়।
গ্ৰন্থ উন্মোচনী অনুষ্ঠানটোত মাধ্যমিক শিক্ষা পৰিষদৰ অধ্যক্ষ ৰমেশ চন্দ্ৰ জৈন আৰু শিক্ষামন্ত্ৰীকে ধৰি ভালেকেইগৰাকী শিক্ষা বিষয়া উপস্থিত থাকে।
উক্ত অনুষ্ঠানত ভাষণ প্ৰদান কৰি নৱম দশম মান শ্ৰেণীত আগতে বাণিজ্য শাখা নাথাকছিল বাবে বাণিজ্য শাখাত নাম ভৰ্তি কৰি একাদশ শ্ৰেণীত পঢ়োতে প্ৰায়বোৰ ছাত্ৰ ছাত্ৰীয়ে অসুবিধা ভুগিবলগীয়া হয় বুলি শিক্ষা মন্ত্ৰী সিদ্ধাৰ্থ ভট্টাচাৰ্য্যই কয়।
এতিয়া হয়তো ছাত্ৰ-ছাত্ৰীসকলে নৱম মান শ্ৰেণীত বাণিজ্য বিষয়টো পঢ়ি আহিলে পিছত ভাল ফল দেখুৱাব পাৰিব বুলিও শিক্ষা মন্ত্ৰীয়ে মত পোষণ কৰে।
‘‘ভাৰত বৰ্ষক আগুৱাই লৈ যাবলৈ হলে আমি নিজৰ শিক্ষা নীতিৰে আগুৱাই নিব লাগিব। নতুন শিক্ষা নীতি অহা বছৰত হয়তো অৱলম্বন কৰিম। নৱম মানৰ বাবে ঐচ্ছিক বিষয় হিচাপে বাণিজ্য বিষয়টো খুবেই দৰকাৰী আছিল। আগৰ বিশৃংখল বোৰ এতিয়া নাই,’’ ভট্টাচাৰ্য্যই ভাষণ প্ৰসংগত কয়।
আনহাতে, প্ৰণয়ন হ’বলগীয়া দশম শ্ৰেণীৰ বাণিজ্য বিভাগৰ কিতাপ খনো ভাল হ’ব বুলি ভট্টাচাৰ্য্য আশাবাদী বুলি উল্লেখ কৰি একাদশ, দ্বাদশৰ বাণিজ্য বিভাগৰ শিক্ষক সকলে নৱম আৰু দশমৰ ঐচ্ছিক বাণিজ্য বিষয়টো পাঠদান কৰিব পাৰিব বুলি কয়।
তদুপৰি, মাধ্যমিক শিক্ষা পৰিষদৰ অধ্যক্ষ জৈনে কোনো শিক্ষকে যদি এই বাণিজ্য বিষয়ৰ কিতাপ খন পঢ়াম বুলি ভাবে তেনেহলে তেওঁলোকৰ বাৱে ১৮ নৱেম্বৰৰ পৰা এটা প্ৰশিক্ষণ অনুষ্ঠিত কৰা হ’ব উল্লেখ কৰে।
উল্লেখযোগ্য যে, ধ্ৰুৱ জ্যোতি বৰুৱা , ৰুনুমণি দাস লস্কৰ (কে চি দাস কমাৰ্চ কলেজৰ অধ্যাপক), ৰতিকান্ত দেৱ পাঠক এই তিনি গৰাকী ব্যক্তিয়ে পাঠ্যপুথি খন লিখি উলিয়াইছে বুলি জৈনে জনায়।