নতুন বছৰৰ প্ৰথম দিনটোতেই সাধাৰণ জনতাৰ বাবে এক হতাশাজনক খবৰ আহিছে। সমগ্ৰ দেশজুৰি বাণিজ্যিক গেছ চিলিণ্ডাৰৰ মূল্য উল্লেখনীয়ভাৱে বৃদ্ধি কৰা হৈছে। চৰকাৰে পিএনজিৰ মূল্য হ্ৰাস কৰিলেও বাণিজ্যিক গেছৰ মূল্যবৃদ্ধিয়ে গ্ৰাহকসকলক চিন্তিত কৰি তুলিছে। আই অ’ চি এলৰ তথ্য অনুসৰি, ২০২৩ চনৰ নৱেম্বৰ মাহৰ পিছত এইবাৰ প্ৰথমবাৰৰ বাবে বাণিজ্যিক গেছ চিলিণ্ডাৰৰ মূল্য ১০০ টকাতকৈ অধিক বৃদ্ধি পাইছে। একেদৰে ২০২৩ চনৰ অক্টোবৰ মাহৰ পিছত এইটোৱেই হৈছে সৰ্বাধিক মূল্যবৃদ্ধি।
দেশৰ চাৰিখন মুখ্য মহানগৰৰ ভিতৰত দিল্লী, কলকাতা আৰু মুম্বাইত বাণিজ্যিক গেছ চিলিণ্ডাৰৰ মূল্য ১১১ টকাকৈ বৃদ্ধি পাইছে আৰু চেন্নাইত বৃদ্ধি পাইছে ১১০ টকা। এই মূল্যবৃদ্ধিৰ ফলত দিল্লীত বাণিজ্যিক চিলিণ্ডাৰৰ নতুন মূল্য ১,৬৯১.৫০ টকা হৈছেগৈ। একেদৰে কলকাতাত ১,৭৯৫ টকা, মুম্বাইত ১,৬৪২.৫০ টকা আৰু চেন্নাইত ১,৮৪৯.৫০ টকা নিৰ্ধাৰণ কৰা হৈছে। অসমৰ গুৱাহাটীত বাণিজ্যিক গেছ চিলিণ্ডাৰৰ মূল্য ১১১ টকা বৃদ্ধি পাই বৰ্তমান ১,৮৮৬.৫০ টকা হৈছেগৈ। দিল্লীত বাণিজ্যিক গেছৰ এই মূল্য ২০২৫ চনৰ জুন মাহৰ পিছত সৰ্বাধিক বুলি বিবেচিত হৈছে।
অৱশ্যে সকাহৰ কথা এইটোৱেই যে ঘৰুৱা এলপিজি গেছ চিলিণ্ডাৰৰ মূল্যত এইবাৰ কোনো ধৰণৰ সালসলনি কৰা হোৱা নাই। আই অ’ চি এলৰ তথ্য মতে, দিল্লীত ঘৰুৱা চিলিণ্ডাৰৰ মূল্য ৮৫৩ টকা, কলকাতাত ৮৭৯ টকা, মুম্বাইত ৮৫২.৫০ টকা, চেন্নাইত ৮৬৮.৫০ টকা আৰু গুৱাহাটীত ৯০২ টকা হৈ আছে। উল্লেখ্য যে ঘৰুৱা গেছ চিলিণ্ডাৰৰ মূল্য শেষবাৰৰ বাবে ২০২৫ চনৰ এপ্ৰিল মাহত প্ৰতি চিলিণ্ডাৰত ৫০ টকাকৈ বৃদ্ধি কৰা হৈছিল।
