১২৯ সংখ্যক সংবিধান সংশোধনী বিধেয়ক আৰু কেন্দ্ৰীয় শাসিত অঞ্চল আইন (সংশোধনী) বিধেয়ক ‘এক দেশ এক ভোট’ মঙলবাৰে সংসদত দাখিল কৰা হয়।
কেন্দ্ৰীয় আইন মন্ত্ৰী অৰ্জুনৰাম মেঘৱালে লোকসভাত উত্থাপন কৰে এই বিধেয়ক।
অৱশ্যে এই বিধেয়কখন অধিক আলোচনা আৰু সিদ্ধান্ত গ্ৰহণৰ বাবে জেপিচি বা সংসদৰ যুটীয়া সমিতিলৈ প্ৰেৰণ কৰা হৈছে। সূত্ৰ অনুসৰি ৩ মাহৰ ভিতৰত চূড়ান্ত সিদ্ধান্ত গম পোৱা যাব।
মঙলবাৰে ই-ভোটিঙত বিধেয়কখনৰ সপক্ষে ২৬৯টা আৰু বিধেয়কৰ বিৰোধিতাত ১৯৮টা ভোট লাভ কৰে। নতুন লোকসভাত প্ৰথমবাৰৰ বাবে বৈদ্যুতিন ভোটিং ব্যৱহাৰ কৰা হয়।
বিধেয়কখনৰ বিষয়ে আলোচনাৰ বাবে ইতিমধ্যে যুটীয়া সংসদীয় সমিতিলৈ প্ৰেৰণ কৰা হৈছে। সূত্ৰ অনুসৰি এই কমিটীত লোকসভাৰ ২১জন আৰু ৰাজ্যসভাৰ ১০জন সদস্য থাকিব। লোকসভাৰ অধ্যক্ষ ওম বিৰলাই এই সমিতিৰ সদস্যসকলক চূড়ান্ত কৰিব। উল্লেখ্য যে লোকসভাত বিজেপিৰ সংখ্যাগৰিষ্ঠতাৰ বাবে এই সিদ্ধান্ত চৰকাৰৰ সপক্ষে যোৱাৰ সম্ভাৱনা বেছি।
যুটীয়া সংসদীয় সমিতিৰ কাৰ্যকাল বৰ্তমান ৯০ দিনৰ বাবে নিৰ্ধাৰণ কৰা হৈছে। বিধেয়ক দুখনত কোনো ধৰণৰ সংশোধনী বা সংযোজনৰ প্ৰয়োজন আছে নে নাই সেই বিষয়ে ৩১ জন সদস্যই পৰীক্ষা কৰিব। প্ৰয়োজন হ’লে সমিতিৰ সময়সীমা বৃদ্ধি কৰিব পাৰে।
ইয়াৰ পিছতে ভোটদানৰ বাবে লোকসভা আৰু ৰাজ্যসভাত বিধেয়কখন দাখিল কৰা হ’ব। দুয়োটা সদনে বিধেয়কখন গৃহীত হোৱাৰ পাছত নিয়ম অনুসৰি ৰাষ্ট্ৰপতিৰ সন্মতিৰ বাবে প্ৰেৰণ কৰা হ’ব। ৰাষ্ট্ৰপতিৰ সন্মতিৰ পিছতহে এই বিধেয়কখন আইনত পৰিণত হ’ব।
