শাসকীয় বিজেপি দলে ক্ষমতাৰ নিচাত অন্ধ হৈ অসমৰ জনপ্ৰিয় শিল্পী জুবিন গাৰ্গ আৰু তেওঁৰ স্বৰ্গীয় ভগ্নী জংকী বৰঠাকুৰক চৰম অৱমাননা কৰাৰ এক গুৰুতৰ অভিযোগ উত্থাপন হৈছে। নিৰ্বাচনী প্ৰচাৰৰ নামত অন্ধ হৈ দলটোৱে বঙাইগাঁও জিলাৰ অভয়াপুৰীত যি কাণ্ড সংঘটিত কৰিলে, তাক লৈ সমগ্ৰ ৰাজ্যজুৰি তীব্ৰ প্ৰতিক্ৰিয়াৰ সৃষ্টি হৈছে।
অভয়াপুৰীৰ দেওহাটীৰ উৰণ সেতুৰ তলত জুবিন অনুৰাগীসকলে জুবিন গাৰ্গ আৰু জংকী বৰঠাকুৰৰ প্ৰতি শ্ৰদ্ধা জনাই অতি আদৰেৰে দুখন দেৱাল চিত্ৰ অংকন কৰিছিল। কিন্তু বিজেপিৰ কৰ্মীসকলে ‘বিজেপি কিয় লাগে’ শীৰ্ষক প্ৰচাৰ চলোৱাৰ উদ্দেশ্যে সেই প্ৰাণৰ শিল্পীগৰাকীৰ প্ৰতিচ্ছবিৰ ওপৰতেই নিজা দলীয় প’ষ্টাৰ লগাই আধাতকৈ অধিক অংশ ঢাকি পেলায়। চৰকাৰী পক্ষই জুবিন গাৰ্গৰ ন্যায় প্ৰদানত বিলম্ব কৰা বা সোণাপুৰৰ জুবিন ক্ষেত্ৰৰ নিৰ্মাণ আধৰুৱা কৰি ৰখাৰ বাবে ইতিমধ্যে সমালোচিত হৈ থকাৰ মাজতে এই ঘটনাই জুইত ঘিঁউ ঢলাৰ দৰে কাম কৰিছে। আনকি চৰকাৰী কাৰ্যালয়ৰ দেৱালতো দলীয় বিজ্ঞাপন লগোৱাৰ পৰা বিৰত থকা নাই গেৰুৱা দলটো।
জুবিন গাৰ্গক লৈ ৰাজনীতি নকৰো বুলি কোৱা দলটোৰ এই মইমতালিক কৃষক মুক্তি সংগ্ৰাম সমিতিকে ধৰি বিভিন্ন দল-সংগঠনে ধিক্কাৰ দিছে। অৱশ্যে জনসাধাৰণৰ তীব্ৰ ক্ষোভ দেখি পৰৱৰ্তী সময়ত বিজেপিৰ একাংশ কৰ্মীয়ে সেই স্থানৰ পৰা প’ষ্টাৰসমূহ আঁতৰাই মুখলজ্জা বচাবলৈ চেষ্টা কৰে যদিও শাসক দলৰ এনে কাণ্ডজ্ঞানহীন কাৰ্যই অসমীয়াৰ আৱেগক গভীৰভাৱে আঘাত কৰিছে।
