দেশত সাম্প্ৰদায়িক পৰিস্থিতি ক্ৰমাৎ বৃদ্ধি পোৱাৰ সময়তে সাম্প্ৰদায়িক সংঘৰ্ষ সৃষ্টি হোৱাৰো সম্ভাৱনাই গা কৰি উঠিছে। এনে সময়তে দেওবাৰে ৰাম নৱমী উৎসৱৰ কাৰ্যসূচীৰ মাজতে গুজৰাট, মধ্য প্ৰদেশ, ঝাৰখণ্ড আৰু পশ্চিম বংগৰ কিছু অংশত সাম্প্ৰদায়িক সংঘৰ্ষৰ সূত্ৰপাত হয়।
গুজৰাটত খাম্বাট চহৰত ৰাম নৱমীৰ শোভাযাত্ৰাৰ সময়ত দুটা গোটৰ মাজত সৃষ্টি হোৱা সংঘৰ্ষৰ ফলত এজন লোক নিহত হয়।
চহৰখনৰ কেইবাখনো দোকানত অগ্নি সংযোগ কৰাৰ ফলত পৰিস্থিতি ভয়াৱহ হৈ পৰে। পৰিস্থিতি নিয়ন্ত্ৰণলৈ আনিবলৈ আৰক্ষীয়ে কন্দুৱা গেছ ব্যৱহাৰ কৰিবলগীয়া হয়।
ৰাজ্যখনৰ হিম্মতনগৰতো দুটা সম্প্ৰদায়ৰ মাজত সংঘৰ্ষৰ সৃষ্টি হয়। এনে পৰিস্থিতিত অঞ্চলটোত অতিৰিক্ত সুৰক্ষা বাহিনী মোতায়েন কৰা হয়।
আনহাতে মধ্য প্ৰদেশৰ খাৰগোনত ৰাম নৱমী উপলক্ষ্যে উলিওৱা শোভাযাত্ৰাত শিলগুটি নিক্ষেপ কৰাৰ ফলত দুই ফৈদৰ মাজত সংঘৰ্ষৰ সূত্ৰপাত হয়।
আৰক্ষীৰ এজন জ্যেষ্ঠ বিষয়াৰ মন্তব্য মতে শিল নিক্ষেপৰ ফলত পৰিস্থিতি ভয়াৱহ হৈ পৰে আৰু তাৰ পিছতে বাহন আৰু স্থানীয় বাসস্থান সমূহত অগ্নিসংযোগ কৰা হয়।
সংঘৰ্ষত কেইবাজনো লোক আহত হয়। লগতে পৰিস্থিতি নিয়ন্ত্ৰণৰ চেষ্টা কৰা তিনিজন আৰক্ষী কৰ্মীও আঘাতপ্ৰাপ্ত হয় বুলি আৰক্ষী বিষয়াজনে জানিবলৈ দিয়ে।
এই সংঘৰ্ষৰ পিছতে সমগ্ৰ খাৰগোন চহৰত কাৰফিউ জাৰি কৰা হৈছে। চহৰখনৰ বাসিন্দা সকলক কেৱল চিকিৎসাজনিত জৰুৰীকালীন অৱস্থাৰ বাবেহে বাহিৰলৈ ওলোৱাৰ অনুমতি দিয়া হৈছে।
ইফালে পশ্চিম বংগৰ হাওৰাতো এটা ৰাম নৱমী শোভাযাত্ৰাত আক্ৰমণ কৰা বুলি অভিযোগ উত্থাপন হৈছে।ৰাজ্যখনৰ বিৰোধী দল বিজেপিয়ে শোভাযাত্ৰাত আৰক্ষীয়ে আক্ৰমণ কৰিছিল বুলি অভিযোগ কৰিছে।
ইতিমধ্যে আৰক্ষীয়ে এই ঘটনাৰ তদন্ত আৰম্ভ কৰিছে। লগতে সমগ্ৰ অঞ্চলটোতে ব্যাপক হাৰত সুৰক্ষা বাহিনীৰ কৰ্মী মোতায়েন কৰা হৈছে।
সেইদৰে ঝাৰখণ্ডৰ বোকাৰো আৰু লোহাৰডাগাতো সংঘৰ্ষৰ খবৰ পোৱা গৈছে। সংঘৰ্ষত ৰাজহুৱা আৰু ব্যক্তিগত সম্পত্তিৰ বিস্তৰ ক্ষতি সাধন হোৱাৰ লগতে কেইবাজনো ব্যক্তি আহত হৈছে বুলি জানিব পৰা গৈছে।
