জনসাধাৰণৰ বিভিন্ন জৰুৰী সমস্যা সমাধানৰ দাবীত আজি ৰাজ্যজুৰি চি পি আই দলে ৰূপায়ণ কৰা গণ বিক্ষোভৰ কাৰ্যসূচী হিচাপে শিৱসাগৰতো জিলা উপায়ুক্তৰ কাৰ্যালয়ৰ সন্মুখত দুঘন্টীয়া অৱস্থান ধৰ্মঘট পালন কৰে।
বিক্ষোভত উপস্থিত থকা চি পি আই নেতা সকলে চৰকাৰক তীব্ৰ সমালোচনা কৰি কয় যে চৰকাৰৰ ভুল আৰ্থিক নীতিৰ বাবেই আজি দেশে অৰ্থনৈতিক মন্দাৱস্থাৰ সন্মুখীন হ’ব লগীয়া হৈছে।
মোদী চৰকাৰে গ্ৰহণ কৰা জি এছ টি আৰু বিমুদ্ৰাকৰণৰ ফলত আজি দেশৰ লাখ লাখ কৰ্মচাৰীয়ে চাকৰি হেৰুৱাব লগীয়া হৈছে বুলিও বিক্ষোভকাৰী সকলে মন্তব্য কৰে।
ইফালে, এন আৰ চিত সকলো ভাৰতীয়ৰ নাম অন্তৰ্ভুক্ত কৰাৰ লগতে যিসকল বিদেশীৰ নাম অন্তৰ্ভুক্ত হৈছে তেওঁলোকক বিদেশী ন্যায়াধীকৰণৰ যোগেদি আঁতৰোৱাৰো দাবী জনায় চি পি আইয়ে।
আজিৰ এই বিক্ষোভ কাৰ্যসূচীৰ জৰিয়তে চি পি আইয়ে মূল্যবৃদ্ধি ৰোধ কৰা, নাগৰিকত্ব বিধেয়ক বাতিল, নিখুত এন আৰ চি প্ৰকাশ কৰি বিদেশী বিতাৰণ কৰা, বান গৰাখহনীয়াক ৰাষ্ট্ৰীয় সমস্যা হিচাপে ঘোষণা কৰা, বৃহৎ নদীবান্ধৰ নিৰ্মাণ বন্ধ কৰা, আলফা সমস্যা আলোচনাৰ জৰিয়তে সমাধান কৰা, নিবনুৱা সমস্যা সমাধান কৰা, তৈল আৰু গেছ ক্ষেত্ৰ সমূহ ব্যক্তিগত কম্পেনিক হস্তান্তৰকৰণ বন্ধ কৰাৰ দাবী জনায়।
ইয়াৰ উপৰি জাগীৰোড আৰু কাছাৰৰ কাগজ কল দুটা পুনৰীজ্জীৱিত কৰা, টেট শিক্ষকৰ চাকৰি নিয়মীয়া কৰা, শিৱসাগৰৰ বেতন বঞ্চিত শিক্ষকৰ চাকৰি নিয়মীয়া কৰাৰ লগতে দৰমহা মুকলি কৰি দিয়া, ঠিকা ভিত্তিক শিক্ষকৰ চাকৰি নিয়মীয়া কৰা, কৃষকৰ দখলীকৃত মাটিৰ পট্টা দিয়া, স্বামীনাথৰ আয়োগৰ পৰামৰ্শ সমূহ কাৰ্যকৰী কৰা, ৰাজ্যৰ শোচনীয় পথ-উপ-পথ সমূহ শীঘ্ৰে পুনৰ নিৰ্মাণ কৰাকে ধৰি বিভিন্ন সমস্যাৰ দাবীত এই গণ বিক্ষোভ কাৰ্যসূচী ৰূপায়ণ কৰে।
চৰকাৰে এই সমস্যা সমূহ সমাধান নকৰা পৰ্যন্ত এইদৰে আন্দোলনৰ কাৰ্যসূচী গ্ৰহণ কৰি যোৱাৰ লগতে প্ৰয়োজন সাপেক্ষে পৰৱৰ্তী সময়ত জংগী আন্দোলন গঢ়ি তুলিব বুলিও জানিবলৈ দিয়ে চি পি আই নেতা কনক গগৈয়ে।
অৱস্থান ধৰ্মঘটত চি পি আই নেতা ধৰ্ম বৰুৱা, মুহি বৰুৱা, কনক গগৈ, জিলা সহকাৰী সম্পাদক মণি বুঢ়াগোহাঁই, কৃষক নেতা মদন বৰুৱা, যোগেশ বুঢ়াগোহাঁই, যুৱ নেতা অনুপ গগৈ, মহিলা নেত্ৰী অনুৰাধা গোহাঁইৰ লগতে জিলাখনৰ শতাধিক নেতা-কৰ্মী উপস্থিত থাকে।
