বিশ্ব ফুটূলত পুনৰ ক’ৰ’ণাই চলাইছে আক্ৰমণ। এইবাৰ কোভিড১৯ত আক্ৰান্ত হৈছে ব্ৰাজিল তথা পিএছজিৰ তাৰকা ফুটবলাৰ নেইমাৰসহ অন্য কেবাজনো খেলুৱৈ।
চেম্পিয়নছ ট্ৰফীৰ ফাইনেলত পৰাজয় বৰণ কৰাৰ পিছতে সতীৰ্থ খেলুৱৈৰ সৈতে স্পেনিছ দ্বীপ ইবিজাত পাৰ্টি কৰিবলৈ গৈছিল জনপ্ৰিয় ফুটবলাৰ গৰাকীয়ে।
উক্ত পাৰ্টিৰ পৰাই বিশ্বৰ অন্যতম জনপ্ৰিয় ফুটবলাৰ গৰাকী ক’ৰ’ণাত আক্ৰান্ত হোৱা বুলি দাবী কৰিছে ফৰাচী সংবাদ মাধ্যমে।
ফৰাচী সংবাদ মাধ্যমৰ দাবী যে নেইমাৰসহ পিএছজিৰ আৰু কেবাজনো ফুটবলাৰ কোভিড১৯ত আক্ৰান্ত হৈছে।
ইয়াৰ মাজত কেলৰ নাভাছো আছে বুলি দাবী কৰিছে ফৰাচী সংবাদ মাধ্যমে।
ফৰাচী সংবাদ মাধ্যমৰ মতে পিএছজিৰ মেনেজমেণ্টে আশংকা কৰিছে যে কেৱল নেইমাৰেই নহয়, দলৰ আৰু কেইবাজনো খেলুৱৈ এই মাৰাত্মক ভাইৰাছৰ দ্বাৰা আক্ৰান্ত হৈছে।
ইতিমধ্যে ক্লাৱৰ ফালৰ পৰা তিনিজন খেলুৱৈ কোভিড১৯ত আক্ৰান্ত হোৱা বুলি প্ৰকাশ কৰা হৈছে যদিও খেলুৱৈসকলৰ নাম প্ৰকাশ কৰাৰ পৰা বিৰত আছে ক্লাৱ কৰ্তৃপক্ষ।
ক্লাৱে আক্ৰান্ত খেলুৱৈসকলৰ নাম প্ৰকাশ নকৰিলেও ফৰাচী সংবাদ পত্ৰ লেকুইপ-এ দাবী কৰিছে নেইমাৰৰ লগতে এঞ্জেল দি মাৰিয়া, লিও পাৰাডেছ, কেলৰ নাভাছ, এণ্ডাৰ হেৰেৰা, মাওৰো ইকাৰ্ডিৰ দৰে তাৰকা খেলুৱৈ কোভিড১৯ত আক্ৰান্ত হৈছে।
সংবাদ পত্ৰখনৰ মতে মেইমাৰ সৈতে এইসকল খেলুৱৈ ইবিজাত পাৰ্টি কৰিবলৈ গৈছিল।
ক্লাৱটোৰ পৰা চ’ছিয়েল মিডিয়াৰ জৰিয়তে এক বিজ্ঞপ্তি প্ৰকাশ কৰা হৈছে, য’ত কোৱা হৈছে যে ক্লাৱৰ তিনিগৰাকী খেলুৱৈৰ শৰীৰত কোভিড১৯ পজিটিভ ধৰা পৰিছে।
ইতিমধ্য আক্ৰান্ত খেলুৱৈকেইজনক কোৱাৰেন্টাইন কৰাৰ লগতে হেলথ প্ৰট’কোল মানি চলা হৈছে বুলি জনোৱা হৈছে ক্লাৱৰ তৰফৰ পৰা।
ক্লাৱ কৰ্তপক্ষই সকলো খেলুৱৈৰে পুনৰ কোভিড টেষ্ট কৰোৱা হ’ব বুলিও ঘোষণা কৰিছে।