নাগা শান্তি আলোচনা সম্পূৰ্ণ কৰাৰ কোনো উম-ঘাম নাই বুলি জানিবলৈ দি ইয়াৰ বাবে আক্ষেপ কৰিছে নাগা হো হোৱে।
এটা প্ৰেছ বিবৃতিত হো হোৱে ইয়াৰ বাবে কেন্দ্ৰীয় চৰকাৰৰ আন্তৰিকতা আৰু ৰাজনৈতিক সদিচ্ছাহীনতাক জগৰীয়া কৰিছে।
হো হোৰ সভাপতি এইচ্ছ কে ঝিমমি আৰু সাধাৰণ সম্পাদক কে ইলু ডাঙে কয় যে নাগাসকলে দীৰ্ঘদিনীয়া নাগা ৰাজনৈতিক অচলাৱস্থাটোৰ সমাধানৰ কোনো লক্ষণ নেদেখাকৈয়ে আন এটা বছৰত প্ৰৱেশ কৰিলে।
“নাগাসকল নাগাভূমিত এটা নতুন সূৰ্য্যৰ উদয় হোৱা চাবলৈ উৎকণ্ঠাৰে ৰৈ আছে আৰু দুটা দশকতকৈ অধিক সময়ৰ আলোচনা-বিলোচনা ইয়াৰ বাবে যথেষ্ট”, বিবৃতিটোত কোৱা হয়।
“ভাৰত চৰকাৰে পিছুৱাই যাব নালাগিব বা ফ্ৰেইমৱৰ্ক এগ্ৰিমেণ্টটোৰ অন্য ব্যাখ্যা কৰিব নালাগিব, যিটো সমাধান বা চুক্তিৰ আধাৰ”, বিবৃতিটোত লগতে কোৱা হয়।
সকলো জটিলতা ফ্ৰেইমৱৰ্ক এগ্ৰিমেণ্টটোৰ আধাৰত হ’ব লাগিব বুলিও হো হোৱে দাবী কৰে।
বিষয়টোত নাগাসকল সহমতত উপনীত নোহোৱাটোকো দুৰ্ভাগ্যজনক আখ্যা দিয়ে হো হোৱে। বিবৃতিটোৰ মতে, একাংশ গোট বা গোষ্ঠীয়ে বৰ্তমানৰ নাগালেণ্ড ৰাজ্যখনৰ বাবে পৃথক সমাধান দাবী কৰি অহাৰ বিপৰীতে আন একাংশই সমগ্ৰ নাগাৰ বাবেই সমাধান অনাৰ চেষ্টা কৰিছে।
আনহাতে ভাৰত চৰকাৰৰ বিৰুদ্ধে গুৰুতৰ অভিযোগ উত্থাপন কৰি হো হোৱে কয়, ভাৰত চৰকাৰে নাগাসকলক বিভাজন কৰা আৰু ১৬টা দফাৰ এগ্ৰিমেণ্টটো ভাৰতৰ সংবিধানৰ আওতাত সংশোধন কৰি সমাধান অনাৰ প্ৰয়াস কৰিছে।
হো হোৱে ইয়াৰ বিৰুদ্ধে সকলো নাগা ৰাজনৈতিক গোটক ঐক্যবদ্ধ হৈ থাকিবলৈ আহ্বান জনায়।
