অসম বহুভাষিক কবি সন্মিলনৰ প্ৰথম অধিৱেশনখনি দুদিনীয়া কাৰ্যসূচীৰে বঙাইগাঁৱৰ বীৰঝৰা পাব্লিক লাইব্ৰেৰীৰ প্ৰেক্ষাগৃহত অনুষ্ঠিত হৈ যায়৷ প্রতিনিধিৰ নাম পঞ্জীয়ন আৰু ইয়াৰ পিছতে কেন্দ্রীয় কার্যনির্বাহক সভা অনুষ্ঠিত হয়৷ আনহাতে অধিৱেশনৰ দ্বিতীয় দিনা সোমবাৰে পুৱা ৮-৩০ বজাত অসম বহুভাষিক কবি সন্মিলনৰ সভাপতি অজিত দত্তই সন্মিলনৰ পতাকা উত্তোলন কৰি অনুষ্ঠানৰ শুভাৰম্ভ কৰে৷
ইয়াৰ পিছতে অসম বহুভাষিক কবি সন্মিলনৰ উপদেষ্টা বিচিত্ৰ শৰ্মাই বন্তি প্ৰজ্বলন কৰে৷ স্মৃতি তর্পণৰ অন্তত অনুষ্ঠিত হয় প্রতিনিধি সভা ৷ অসম বহুভাষিক কবি সন্মিলনৰ সভাপতি অজিত দত্তৰ পৌৰহিত্যত অনুষ্ঠিত মুকলি সভাত আদৰণী ভাষণ প্ৰদান কৰে সন্মিলনৰ কাৰ্যকৰী সভাপতি কাজী শ্বামীমে৷
ইয়াৰ পিচতে প্ৰতিবেদন পাঠ কৰে প্ৰধান সম্পাদক শৈলেন্দ্ৰ প্ৰসাদ শৰ্মাই৷ সভাত বঙাইগাঁও জিলাৰ অতিৰিক্ত আৰক্ষী অধীক্ষক লুণা সোণোৱাল, অভ্যৰ্থনা সমিতিৰ সভাপতি কাজী শ্বামীম, অসম বহুভাষিক কবি সন্মিলনৰ প্ৰধান সম্পাদক শৈলেন্দ্ৰ প্ৰসাদ শৰ্মা, দীনেশ চন্দ্ৰ দাস, বহুভাষিক কবি সন্মিলনৰ উপ সভাপতি ক্ৰমে ৰূপজ্যোতি দত্ত, ড°হৰ্ক বাহাদুৰ ছেত্ৰী,তৰুণ কুমাৰ বাহাদুৰ আদি বিশিষ্ট ব্যক্তিয়ে অংশগ্ৰহণ কৰে৷
সভাত অসম বহুভাষিক কবি সন্মিলনৰ সভাপতি অজিত দত্তই ইন্দুমতি শইকীয়াক “মুকুন্দ শৰ্মা সোঁৱৰণী বঁটা প্ৰদান কৰে ৷একেখন সভাত দীনেশ চন্দ্ৰ দাসৰ ‘জগতগুৰু শ্ৰীমন্ত শংকৰদেৱ’ আৰু ‘শক্তিয়েই জীৱন’ সাধন দেৰ ‘ শংখদ্বীপ’ আৰু ‘ঐ মহামানৱ আছে ‘জ্যোৎস্না বিশ্বাস দেৰ উপন্যাস ‘প্ৰেমৰ সিপাৰে প্ৰেম’, প্ৰাণেশ্বৰ কলিতাৰ গীতৰ সংকলন ‘ঋতু আহে ঋতু যায়’ আৰু অধিৱেশনৰ লগত সংগতি ৰাখি ড°নুৰ জামালৰ মুখ্য সম্পাদনাত প্ৰকাশ কৰা কাব্য সংকলন ‘কাব্যকল্প’ আদি গ্ৰন্থ উন্মোচন কৰা হয়৷ অনুষ্ঠানত অসম বহুভাষিক কবি সন্মিলনৰ বাৰ্ষিক অধিৱেশনৰ সংগতি ৰাখি ৰাজ্যিক ভিত্তিত আয়োজিত বহুভাষিক স্বৰচিত কবিতা প্ৰতিযোগিতাত প্ৰথম ছয়টা স্থান দখল কৰা ক্ৰমে বৰপেটাৰ মেটুৱাকুছিৰ গুণজিৎ শইকীয়া ( পুনৰ্জন্ম), গোলাঘাটৰ বৰুৱাগাঁৱৰ দিব্যজ্যোতি বৰুৱা ( জীৱন), বঙাইগাঁৱৰ প্ৰিয়া কুমাৰী শ্বাহ(মেৰা সাথ দেনা ,যোৰহাটৰ যোগদুৱাৰৰ ৰীতা বৰুৱা ‘ (হাফ দ্যা স্কাই, মৰিয়নিৰ নাগাজাংকা নগাঁৱৰ অৰুণ গগৈ (আখৰা), তেজপুৰৰ বালিপুখুৰী তিনিআলিৰ মনোজ বৰা (চাকৰিৰ বিজ্ঞাপন ওলাইছে) ক বঁটা সমূহ প্ৰদান কৰা হয়৷
সভাৰ বিভিন্ন কাৰ্যসূচীৰ আঁত ধৰে মালা বৰুৱা আৰু মীনা দেৱীয়ে ৷ দুপৰীয়া আহাৰ বিৰতিৰ অন্তত অনুষ্ঠিত অসম বহুভাষিক কবি সন্মিলনৰ সভাপতি অজিত দত্তই কবি সন্মিলনৰ শুভ উদ্বোধন কৰে৷
কবি সন্মিলনৰ অধিৱেশনৰ অভ্যৰ্থনা সমিতিৰ সভাপতি কাজী শ্বামীমৰ সঞ্চালনাত অনুষ্ঠিত কবি সন্মিলনত শতাধিক কবিয়ে বিভিন্ন ভাষাৰ স্বৰচিত কবিতা পাঠ কৰি অনুষ্ঠানটোক জীপাল কৰি তোলে৷
