হিমাচল প্ৰদেশত ক্ৰমাৎ জমি উঠিছে নিৰ্বাচনী প্ৰচাৰ। ৰাজ্য খনত বিজেপিয়ে বহু চেষ্টা কৰিও এইবাৰ মোদী ঢৌ আনিবলৈ সক্ষম হোৱা নাই। ২০১৪ চনৰ লোকসভা নিৰ্বাচনত মোদী ঢৌৰ সহায়তে বিজেপিয়ে কেন্দ্ৰত শাসনৰ মছনদ দখল কৰিবলৈ সক্ষম হৈছিল। এইবাৰ গুজৰাটকে ধৰি কেইবা খনো ৰাজ্যত নিৰ্বাচনৰ দিন ঘোষণা হোৱাৰ পিছতো খোদ মোদীৰ ৰাজ্য গুজৰাটতে মোদী ঢৌ বোৱা নাই।
এনে পৰিস্থিতিত চিন্তিত হৈ পৰিছে মোদী? আজি হিমাচল প্ৰদেশৰ চোলানৰ এখন নিৰ্বাচনী জনসভাত ভাষণ দি মোদীয়ে কয়- ‘মোক ভোট দিয়ক, প্ৰাৰ্থীক নহয়’ । এনে আবেগিক মন্তব্যৰে মোদীয়ে ৰাজ্য খনৰ ভোটাৰৰ মন মুহিবলৈ চেষ্টা চলাইছে যদিও আপৰ উত্থানে এতিয়া হিমাচলত বিজেপিক চিন্তাত পেলাইছে। হিমাচল প্ৰদেশ বিধানসভা নিৰ্বাচনৰ পূৰ্বে কংগ্ৰেছক তীব্ৰ আক্ৰমণ কৰি প্ৰধানমন্ত্ৰী নৰেন্দ্ৰ মোদীয়ে শনিবাৰে কয় যে কংগ্ৰেছৰ অৰ্থ হৈছে “দুৰ্নীতি আৰু স্বাৰ্থপৰ ৰাজনীতি”ৰ গেৰাণ্টি ।প্ৰধানমন্ত্ৰীয়ে ৰাজ্যখনত ‘ভাৰতীয় জনতা পাৰ্টিৰ দ্বৈত ইঞ্জিন চৰকাৰৰ উন্নয়নৰ পদক্ষেপ আৰু নীতিৰ বিষয়ত আলোকপাত কৰে।
চোলানত ‘বিজয় সংকল্প ৰেলী’ সম্বোধন কৰি প্ৰধানমন্ত্ৰী মোদীয়ে কয়, “হিমাচল প্ৰদেশক এখন বিজেপি চৰকাৰৰ প্ৰয়োজন, যি খন চৰকাৰে ৰাজ্য খনক স্থিৰতা প্ৰদান কৰিব।৩০ বছৰ ধৰি দিল্লীত অস্থিৰতা আছিল। বাৰে বাৰে অনুষ্ঠিত হোৱা নিৰ্বাচনত হাজাৰ হাজাৰ কোটি টকা অপচয় হৈছিল। চৰকাৰ আহিছিল আৰু গৈছিল। ২০১৪ চনত মানুহে এক স্থিৰ চৰকাৰৰ বাবে ভোট দিছিল।”
প্ৰধানমন্ত্ৰীয়ে কয়, “আপুনি বিজেপি প্ৰাৰ্থীক মনত ৰখাৰ প্ৰয়োজন নাই, কেৱল আপুনি ভোট দিবলৈ যাওঁতে ‘লোটাছ’ৰ প্ৰতীকটো মনত ৰাখিব। মই আপোনাৰ ওচৰলৈ ‘লোটাছ’ লৈ আহিছোঁ। আপুনি য’তেই ‘লোটাছ’ৰ প্ৰতীক দেখিছে তাৰ অৰ্থ হৈছে এয়া বিজেপি আৰু মোদীজী আপোনাৰ ওচৰলৈ আহিছে।” হিমাচল প্ৰদেশত ১২ নৱেম্বৰত নিৰ্বাচন অনুষ্ঠিত হ’ব। ফলাফল ৮ ডিচেম্বৰত ঘোষণা কৰা হ’ব।
