আজি অনুষ্ঠিত হোৱা অসম বিধানসভাৰ জৰুৰীকালীন অধিৱেশনত নাগৰিকত্ব (সংশোধন) আইনৰ বিৰোধিতাৰে তীব্ৰ প্ৰতিবাদ সাব্যস্ত কৰা হয়।
ৰাজ্যপাল জগদীশ মুখীৰ অধিভাষণেৰে আৰম্ভ হোৱা বিধানসভাৰ জৰুৰীকালীন অধিৱেশনত আৰম্ভণিৰে পৰা কংগ্ৰেছ আৰু এ আই য়ু ডি এফৰ বিধায়কসকলে তীব্ৰ প্ৰতিবাদ সাব্যস্ত কৰে।
কংগ্ৰেছৰ বিধায়ক জাকিৰ হুছেইন শিকদাৰ আৰু এ আই য়ু ডি এফৰ বিধায়ক সকলে বিধানসভাৰ বাহিৰত C(A)A-ৰ বিৰুদ্ধে প্ৰতিবাদ সাব্যস্ত কৰে।
C(A)A বিৰোধী বিধায়কসকলে বিধানসভাৰ বাহিৰত ‘‘C(A)A আমি নামানো, C(A)A বাতিল কৰক’’ আদি প্লে-কাৰ্ড লৈ প্ৰতিবাদ সাব্যস্ত কৰে।
কংগ্ৰেছ নেতা তথা বিৰোধী দলপতি দেৱব্ৰত শইকীয়াই বিধানসভাৰ মজিয়াতো আইনখনৰ বিৰুদ্ধে মত প্ৰকাশ কৰি এই আইনখন বলপূৰ্বকভাৱে অসমৰ জনসাধাৰণৰ ওপৰত জাপি দিয়া হৈছে বুলি কয়।
আনহাতে, অসমৰ প্ৰাক্তন মুখ্য মন্ত্ৰী তৰুণ গগৈয়ো বিধানসভাত নাগৰিকত্ব (সংশোধন) আইনক লৈ চৰকাৰৰ বিৰুদ্ধে সমালোচনাত মুখৰ হৈ পৰে।