২০২১ ৰ বিধানসভা নিৰ্বাচনত বিজেপিৰ বিৰুদ্ধে যুঁজিবলৈ আনুষ্ঠানিকভাৱে হাতে হাত মিলালে দুটাকৈ ৰাষ্ট্ৰীয় দল ক্ৰমে কংগ্ৰেছ আৰু চিপিআই(এম)এ।
আজি মহানগৰীৰ খ্ৰীষ্টানবস্তিৰ হোটেল গেটৱে গ্ৰেণ্ডত এক গুৰুত্বপূৰ্ণ বৈঠকত মিলিত হয় কংগ্ৰেছ আৰু চিপিআই(এম)ৰ নেতৃত্ব।
সেই বৈঠকতে মিত্ৰতাৰ সিদ্ধান্ত লয় দুয়োটা দলে।
এই বৈঠকত বিজেপিক পৰাভূত কৰাৰ স্বাৰ্থত দুয়োটা দলে ঐক্যৱদ্ধভাৱে কাম কৰাৰ পোষকতা কৰে।
ইয়াৰোপৰি, জনসাধাৰণৰ স্বাৰ্থৰ সৈতে জড়িত বিষয়সমূহত ঐক্যৱদ্ধভাৱে যুঁজ দিয়াৰ ক্ষেত্ৰতো দুয়োটা দলে সহমত প্ৰকাশ কৰে বুলি জানিবলৈ দিয়ে প্ৰদেশ কংগ্ৰেছৰ সম্পাদক তথা মুখপাত্ৰ প্ৰফুল্ল কুমাৰ দাসে।
এইক্ষেত্ৰত বিজেপি, আৰএছএছ তথা সাম্প্ৰদায়িকতা বিৰোধী সকলো শক্তিক একগোট হৈ ঐক্যবদ্ধ সংগ্ৰামৰ জৰিয়তে বিজেপিক উৎখাত কৰিবলৈয়ো এই বৈঠকতে আহ্বান জনায় বুলি তেওঁ উল্লেখ কৰে।
আজিৰ এই বৈঠকত কংগ্ৰেছ দলৰ হৈ প্ৰদেশ কংগ্ৰেছৰ সভাপতি ৰিপুণ বৰা, সাংসদ গৌৰৱ গগৈ, কংগ্ৰেছ বিধায়িনী দলৰ নেতা তথা বিৰোধী দলপতি দেৱব্ৰত শইকীয়া, উপ দলপতি ৰকিবুল হুছেইন উপস্থিত থকাৰ বিপৰীতে চিপিআই (এম) দলৰ হৈ বৰ্ষীয়ান নেতা হেমেন দাস, প্ৰাক্তন সাংসদ উদ্ধৱ বৰ্মন, দলটোৰ ৰাজ্যিক সম্পাদক দেবেন ভট্টাচাৰ্য আৰু সম্পাদক মণ্ডলীৰ সদস্য সুপ্ৰকাশ তালুকদাৰ উপস্থিত থাকে।
বৈঠকৰ সমন্বয়ক হিচাপে উপস্থিত থাকে মুখপাত্ৰ তথা প্ৰদেশ কংগ্ৰেছৰ আৰ টি আই বিভাগৰ অধ্যক্ষ কমল কুমাৰ মেধি আৰু প্ৰদেশ কংগ্ৰেছৰ সম্পাদক তথা মুখপাত্ৰ প্ৰফুল্ল কুমাৰ দাস।
