আগন্তুক লোকসভা নিৰ্বাচনৰ বাবে আজি কোকৰাঝাৰ লোকসভা সমষ্টিৰ কংগ্ৰেছ প্ৰাৰ্থী শব্দৰাম ৰাভাই সদল বলে গৈ কোকৰাঝাৰ নিৰ্বাচনী ৰিটাৰ্নিং বিষয়াৰ কাৰ্যালয়ত মনোনয়ন পত্ৰ দাখিল কৰে।
মনোনয়ন পত্ৰ দাখিলৰ সময়ত ৰাভাই শতাধিক দলীয় কৰ্ম-কৰ্তা আৰু সমৰ্থকৰ সৈতে সমদল কৰি আহি মনোনয়ন পত্ৰ দাখিল কৰে। বিভিন্ন দল-সংগঠনৰ প্ৰতিনিধিসকলেও সাংস্কৃতিক শোভাযাত্ৰাৰে সংগ দিয়ে কংগ্ৰেছৰ প্ৰাৰ্থীগৰাকীৰ মনোনয়নৰ সময়ত।
মনোনয়ন দাখিলৰ পাছত সংবাদ মাধ্যমৰ সৈতে হোৱা মুখামুখিত শব্দৰাম ৰাভাই কোকৰাঝাৰ সমষ্টিৰ পৰা তেওঁ বিপুল ভোটত জয়লাভ কৰিব বুলি কয়।
আনহাতে, বৰ্তমানৰ সাংসদ নৱ কুমাৰ শৰণীয়া নিৰ্বাচনৰ কোনো ফেক্টৰ নহয় বুলি উল্লেখ কৰি বি পি এফৰ প্ৰাৰ্থী প্ৰমীলা ৰাণী ব্ৰহ্মৰ লগতো তেওঁৰ প্ৰতিদ্বন্দ্বিতা নহয় বুলি কয়। কোকৰাঝাৰত মূল যুঁজখন য়ু পি পি এলৰ প্ৰাৰ্থী উৰ্খাও ব্ৰহ্মৰ লগতহে কংগ্ৰেছৰ হ’ব বুলি তাৎপৰ্য্যপূৰ্ণ মন্তব্য কৰে কংগ্ৰেছৰ প্ৰাৰ্থীগৰাকীয়ে।
উল্লেখযোগ্য যে, কোকৰাঝাৰ সমষ্টিত ৰাজ্যৰ তৃতীয় পৰ্য্যায় অৰ্থাৎ ২৩ এপ্ৰিলত নিৰ্বাচন অনুষ্ঠিত হ’ব।
