কংগ্ৰেছ সভাপতি খাৰ্গেৰ হেলিকপ্টাৰত তালাচী; গণতন্ত্ৰক হত্যা কৰাৰ অভিযোগ তুলি সৰৱ কংগ্ৰেছ!

সৰ্বভাৰতীয় কংগ্ৰেছ সভাপতি মল্লিকাৰ্জুন খাৰ্গেৰ হেলিকপ্টাৰত চলোৱা হয় তালাচী। ইয়াতে ক্ষুব্ধ হৈ পৰিছে কংগ্ৰেছ নেতাসকল, ভাইৰেল হৈছে ভিডিঅ’। কিন্তু কিয় চলোৱা হ’ল তালাচী!

শনিবাৰে বিহাৰৰ সমষ্টিপুৰত কংগ্ৰেছ সভাপতি মল্লিকাৰ্জুন খাৰ্গেৰ হেলিকপ্টাৰত তালাচী চলোৱা হয়। জানিব পৰা মতে নিৰ্বাচন আয়োগৰ নিৰ্দেশমৰ্মে এই তালাচী চলোৱা হৈছিল। অৱশ্যে তালাচীত একো পোৱা নগ’ল।

কংগ্ৰেছে খাৰ্গেৰ হেলিকপ্টাৰত তালাচীৰ ঘটনাক ‘গণতন্ত্ৰৰ হত্যা’ বুলি অভিহিত কৰিছে। খাৰ্গেৰ হেলিকপ্টাৰত তালাচীৰ ভিডিঅ’ এতিয়া ছ’চিয়েল মিডিয়াত ভাইৰেল হৈ পৰিছে। যাক কেন্দ্ৰ কৰি আৰম্ভ হৈছে এক তীব্ৰ ৰাজনৈতিক বিতৰ্ক।

স্থানীয় কংগ্ৰেছৰ নেতাসকলে এই তালাচীত আপত্তি কৰি এই পদক্ষেপৰ বিৰোধিতা কৰে। বৈঠকত ভাষণ দি খাৰ্গেই কয় যে এই নির্বাচন দেশৰ গণতন্ত্র আৰু সংবিধান ৰক্ষাৰ নির্বাচন৷ দেশৰ সংবিধান আৰু গণতন্ত্ৰ ৰক্ষাৰ বাবে কংগ্ৰেছ প্ৰতিশ্ৰুতিবদ্ধ।

এই সন্দৰ্ভত সদৰৰ এছ ডি অ’ দিলীপ কুমাৰে কয় যে নিৰ্বাচন আয়োগৰ নিৰ্দেশ অনুযায়ী ব্যৱস্থা গ্ৰহণ কৰা হৈছে। সকলো প্ৰতিবেদন আয়োগলৈ প্ৰেৰণ কৰা হৈছে।