বিধানসভা নিৰ্বাচনৰ পূৰ্বে ৰাজনৈতিক আক্ৰমণৰ পৰ্যায় তীব্ৰতৰ হৈ পৰিছে। নেতাসকলে ইজনে সিজনৰ ওপৰত অভিযোগ-প্ৰত্যাভিযোগ আৰম্ভ কৰিছে। ছত্তীশগড়ত বিজেপি নেত্ৰী তথা কেন্দ্ৰীয় ৰাজ্যিক মন্ত্ৰী ৰেনুকা সিঙে ছোনিয়া গান্ধীক লৈ অতি অশালীনভাৱে বিতৰ্কিত বক্তব্য প্ৰদান কৰিছে। তেওঁ কয় যে ছোনিয়া গান্ধীক ‘’ধ্বাকা মাৰি’’ ইটালীলৈ পঠিয়াব লাগে। তেওঁৰ বক্তব্যত ক্ষুব্ধ হৈ পৰিছে কংগ্ৰেছ।
দৰাচলতে মঙলবাৰে ছত্তীশগড়ৰ ভৰতপুৰ সোণহাট বিধানসভাৰ বিজেপিৰ প্ৰাৰ্থী তথা কেন্দ্ৰীয় ৰাজ্যিক মন্ত্ৰী ৰেনুকা সিঙে স্থানীয় আৰু বাহিৰৰ প্ৰাৰ্থীৰ অভিযোগক লৈ কংগ্ৰেছৰ প্ৰাক্তন ৰাষ্ট্ৰীয় সভানেত্ৰী ছোনিয়া গান্ধীৰ ভাৰতত থকাকলৈ পোনপটীয়াকৈ প্ৰশ্ন উত্থাপন কৰে।
তেওঁ কয় যে তেওঁলোকে (কংগ্ৰেছে) ছোনিয়া গান্ধীক ‘’ধ্বাকা মাৰি’’ ইটালীলৈ পঠিয়াই দিব লাগে আৰু তাৰ পিছত মোক প্ৰশ্ন কৰিব লাগে। তেওঁলোকে চাব লাগে যে তেওঁলোকৰ ঘৰটো কাঁচ নে কংক্ৰিটৰ। ইয়াৰ পিছত আনক প্ৰশ্ন কৰা উচিত।
লগতে পঢ়কঃ ১৪ বছৰৰ পাছত মৃত সাংবাদিকে পালে ন্যায় : সৌম্য বিশ্বনাথনক হত্যাৰ দোষত ৫ জনক দোষী সাব্যস্ত আদালতৰ
বিজেপি নেত্ৰীগৰাকীয় কয় যে অবিভক্ত কোৰিয়া জিলা মোৰ মাতৃৰ ঘৰ। মোৰ দেউতাই জনকপুৰত কাম কৰে। এই অঞ্চললৈ মই বহুবাৰ আহিছো। ভৰতপুৰ সোণহাটৰ ৰাইজ মোৰ বিষয়ে অজ্ঞাত নহয় আৰু ইয়াত সমস্যাৰ বিষয়ে মই সম্পূৰ্ণৰূপে অৱগত। এইয়া মোৰ মাটি, ইয়াৰ বতাহ আৰু পানীয়ে মোক শক্তি দিছে।
কংগ্ৰেছে বিজেপিৰ এই বক্তব্যক সনাতন সংস্কৃতিক অপমান বুলি অভিহিত কৰিছে। এই বক্তব্যৰ বিৰুদ্ধে আপত্তি জনাই কংগ্ৰেছৰ ৰাজ্যিক সভাপতি দীপক বৈজে কয় যে ৰেণুকা সিঙে তেওঁৰ বক্তব্যৰ জৰিয়তে ভাৰতীয় সংস্কৃতিক লৈ গৌৰৱ কৰা কিন্তু ভাৰতৰ ভাৰতীয় পৰম্পৰা আৰু মূল্যবোধৰ বিৰুদ্ধে বক্তব্য দিয়া বিজেপিৰ মৌলিক নাৰীবিৰোধী চৰিত্ৰও উদঙাই দিছে।
তেওঁ কয় যে ৰেণুকা সিঙে কেৱল দেশবাসীৰ ওচৰতে নহয়, ছোনিয়া গান্ধীৰ লগতে দেশৰ মহিলাসকলৰ ওচৰতো ক্ষমা খুজিব লাগে।
তদুপৰি দীপক বৈজে লগতে কয় যে ৰেণুকা সিঙে হিন্দু সংস্কৃতিক অপমান কৰিছে। সনাতন পৰম্পৰাত, ভাৰতীয় সংস্কৃতিত বিবাহিত মহিলাৰ শহুৰেকৰ ঘৰখন বিয়াৰ পিছতে তেওঁৰ মূল ঘৰ হৈ পৰে। ইটালীত জন্মগ্ৰহণ কৰিলেও ছোনিয়া গান্ধী কিন্তু বিয়া পাতি ভাৰতলৈ আহিছিল।
লগতে পঢ়কঃ‘পত্নীয়ে ৰান্ধিব নজনাটো কোনো নিষ্ঠুৰতা নহয়’- বিবাহ বিচ্ছেদ বিচৰাৰ কাৰণ শুনি ক’লে আদালতে
বৈজে কয় যে বিয়াৰ পিছত তেওঁ ভাৰতকেই নিজৰ মাতৃভূমি বুলি গণ্য কৰিছে। স্বামী শ্বহীদ হোৱাৰ পাছতো তেওঁ এগৰাকী বিবাহিত মহিলাৰ কৰ্তব্য পালন কৰি ভাৰতৰ সৈতে আজীৱন সম্পৰ্ক বজাই ৰাখিছে। ছোনিয়া গান্ধীয়ে প্ৰধানমন্ত্ৰীৰ দৰে গুৰুত্বপূৰ্ণ পদ নাকচ কৰি প্ৰমাণ কৰিছে যে পদ তেওঁৰ বাবে গুৰুত্বপূৰ্ণ নহয়।
