বৰাকৰ অবিসম্বাদী কংগ্ৰেছ নেতা প্ৰাক্তন মন্ত্ৰী গৌতম ৰয়ে বিজেপিৰ বিজয়ত মুকলিভাৱে উল্লাস প্ৰদৰ্শন কৰা বিষয়কলৈ অস্বস্তিত পৰিছে কংগ্ৰেছ। বৰাকৰ দুখন আসনত বিজেপি জয়ী হোৱাৰ পাছত গৌতম ৰয়ে মিঠাই খুৱাই, ফাকু খেলি আনন্দত আত্মহাৰা হোৱা ঘটনাৰ তদন্তৰ কৰাৰ কথা সদৰী কৰিছে প্ৰদেশ কংগ্ৰেছৰ সভাপতি ৰিপুন বৰাই।
অৱশ্যে, গৌতম ৰায়ৰ বিৰুদ্ধে ব্যৱস্থা গ্ৰহণৰ দায় প্ৰদেশ কংগ্ৰেছে হাইকামাণ্ডলৈ ঠেলিছে। ইপিনে, পূৰ্বৰে পৰা বিজেপিৰে সু-সম্পৰ্ক বজাই ৰখা বুলি গৌতম ৰয় বিৰুদ্ধে অভিযোগ উত্থাপন হৈ আহিছে। বিজেপিৰ বিজয়ৰ মুহূৰ্তত নেতা গৰাকীয়ে ‘জয় শ্ৰীৰাম’ ধ্বনি দিয়াৰ বিষয়টোৱেও ছচিয়েল মিডিয়াৰ লগতে বিভিন্ন মাধ্যমত ব্যাপক চৰ্চা লাভ কৰিছে।
এই সন্দৰ্ভত বৰাকৰ ‘গ্লেমাৰ বয়’ ৰূপে পৰিচিত গৌতম ৰয়ে ব্যক্ত কৰিছে যে ভগবান ৰামক স্মৰণ কৰাটো কোনো দলৰ শ্ল’গান বুলি তেওঁ নাভাৱে। সনাতন ধৰ্মৰ যিকোনো লোকেই ভগৱান ৰামচন্দ্ৰক স্মৰণ কৰিব পাৰে। হিন্দু লোকৰ ঘৰত ভগৱান ৰামচন্দ্ৰ পূজিত হয়, তাত আনলোকৰ আপত্তি কিয়?
তদুপৰি, ৰয়ে কয় যে আন কিছুমান ৰাজনৈতিক দলে ‘ভাৰত মাতা কি জয়’ বুলি ক’বলৈ কুণ্ঠাবোধ কৰে। ইয়াৰ কি কাৰণ থাকিব পাৰে? ‘আমি যদি ভাৰত দেশমাতৃৰ সন্তান হওঁ তেনেহ’লে তাৰ জয়ধ্বনি কিয় নিদিম।‘
এই সকলোবোৰ তেওঁৰ ব্যক্তিগত মন্তব্য বুলি উল্লেখ কৰি গৌতম ৰয়ে ‘জয় শ্ৰীৰাম’ আৰু ‘ভাৰত মাতা কি জয়’ ধ্বনি দিয়াটো তেওঁৰ জন্মগত অধিকাৰ বুলিও স্পষ্ট কৰি তেওঁ এই ধ্বনি আজীৱন দি যাব বুলি সদৰী কৰে।
গৌতম ৰয়ৰ এনে মন্তব্যই স্বাভাৱিকতে কংগ্ৰেছক অস্বস্তিত পেলাইছে যদিও বৰ্তমান নিৰ্বাচনী পৰাজয়ত হালি পৰা দলটো কাৰোবাৰ বিৰুদ্ধে ব্যৱস্থা গ্ৰহণৰ পদক্ষেপ ল’ব পৰা স্থিতি এতিয়াও অহা নাই।
