চামগুৰিত এন পি পিৰ প্ৰাৰ্থী আব্দুল আজিজৰ পাছতেই এইবাৰ দুৰ্বৃত্তৰ আক্ৰমণৰ সন্মুখীন হ’বলগীয়া হয় লখিমপুৰৰ কংগ্ৰেছ প্ৰাৰ্থী অনিল বৰগোহাঁই।
ঘটনাৰ বিৱৰণি মতে আজি জোনাইত এখন নিৰ্বাচনী প্ৰচাৰ সভাত কংগ্ৰেছ প্ৰাৰ্থী অনিল বৰগোহাঁয়ে অংশ গ্ৰহণ কৰি ওভতাৰ পথত চিলাপথাৰৰ সমীপৱৰ্তী চিলাসূঁতিত সন্মিলিত গণশক্তি আৰু টাকাম মিচিং পৰিন কাবাঙৰ সদস্যই আক্ৰমণ কৰে।
বিয়লি ৪.২০ বজাত উক্ত দল দুটাৰ সদস্য আৰু সমৰ্থকে কংগ্ৰেছ প্ৰাৰ্থীজনৰ গাড়ীলৈ শিলগুটি নিক্ষেপ কৰে। ফলত বৰগোহাঁইৰ এ এছ ২২ বি ৪২৮৪ মহিন্দ্ৰা এক্স য়ু ভি বাহনখনৰ পিছফালৰ আইনা ভাঙি যায়। অৱশ্যে এই ঘটনাত কথমপি ৰক্ষা পৰে লখিমপুৰ লোক সভাৰ কংগ্ৰেছ প্ৰাৰ্থী অনিল বৰগোহাঁই।
আনহাতে এই ঘটনাৰ পাছতেই উত্তপ্ত হৈ পৰে উক্ত স্থান। একাংশ কংগ্ৰেছ কৰ্মী ঘটনাস্থলীত উপস্থিত হৈ ঘটনাক গৰিহণা দিয়াৰ লগতে প্ৰতিবাদ সাব্যস্ত কৰে। কংগ্ৰেছ কৰ্মীসকলে কিছুসময়ৰ বাবে ৰাষ্ট্ৰীয় ঘাইপথ অৱৰোধ কৰি দোষীক কৰায়ত্ত কৰাৰ দাবী জনায়। পিছত আৰক্ষীৰ শীৰ্ষ বিষয়া ঘটনাস্থলীত উপস্থিত হৈ পৰিস্থিতি নিয়ন্ত্ৰণ কৰাৰ লগতে ঘটনা সন্দৰ্ভত তদন্ত আৰম্ভ কৰিছে।
উল্লেখযোগ্য যে পূৰ্বতেও নগাঁৱৰ ৰূপহীহাটৰ গেৰুৱাটিত প্ৰথম পৰ্য্যায়ৰ লোকসভা নিৰ্বাচনৰ প্ৰচাৰ চলাব যোৱাৰ সময়তে এন পি পিৰ প্ৰাৰ্থী আব্দুল আজিজৰ কনভয়ৰ তিনিখন গাড়ীত আক্ৰমণৰ ঘটনা সংঘটিত হৈছিল। কংগ্ৰেছী গুণ্ডাবাহিনীয়ে এই আক্ৰমণৰ কৰাৰ অভিযোগ তুলিছিল এন পি পি কৰ্মীসকলে। এই আক্ৰমণত আজিজৰ কেইবাজনো সমৰ্থক আহত হোৱাৰ লগতে কনভয়ৰ তিনিখন গাড়ী বেয়াকৈ ক্ষতিগ্ৰস্ত হৈছিল।
