ক্ষুব্ধ কৰ্মী-ৰাইজৰ ৰোষত কংগ্ৰেছী নেতা : বাধ্য হৈ ত্যাগ কৰিলে সভাস্থলী

সমাগত পঞ্চায়ত নিৰ্বাচনত বৰপেটা জিলাত কংগ্ৰেছীৰ বিৰুদ্ধে কংগ্ৰেছীৰ মুকলি বিদ্ৰোহ অব্যাহত আছে ৷ দলীয় প্ৰাৰ্থিত্ব প্ৰদানত একাংশ কংগ্ৰেছ কৰ্মীয়ে ধনৰ লেনদেন কৰা বুলি অভিযোগ উত্থাপন কৰি ২৬ নৱেম্বৰত একাংশ কংগ্ৰেছ কৰ্মীয়ে বৰপেটা ৰাজীৱ ভৱনত তলা ওলোমৱাৰ লগতে বৃহস্পতিবাৰে বৰপেটা ৰাজীৱ ভৱনত অনশন কাৰ্যসূচী ৰূপায়ণ কৰিছিল একাংশ কংগ্ৰেছ কৰ্মীয়ে ৷

পঞ্চায়ত নিৰ্বাচনত দলীয় প্ৰাৰ্থিত্ব প্ৰদানত প্ৰাক্তন মন্ত্ৰী শুকুৰ আলী, জিলা সভাপতি শান্তনু শৰ্মা আৰু আমছুৰ প্ৰাক্তন সভাপতি তথা কংগ্ৰেছ দলৰ সাধাৰণ সম্পাদক আব্দুৰ ৰহিম আহমেদে ধনৰ লেনদেন কৰা বুলি অভিযোগ উত্থাপন কৰিছিল।

শুকুৰবাৰে একাংশ ক্ষুব্ধ কংগ্ৰেছ কৰ্মী আৰু ৰাইজৰ বাবে অনাহুত পৰিস্থিতিৰ সন্মুখীন হয় কংগ্ৰেছ দলৰ সাধাৰণ সম্পাদক আব্দুৰ ৰহিম আহমেদ। আহমেদে জিলাখনৰ দাবালীয়াপাৰাত প্ৰচাৰৰ বাবে আহোতে ক্ষুব্ধ কংগ্ৰেছ কৰ্মী আৰু ৰাইজৰ বাবে সভাস্থলী ত্যাগ কৰিবলৈ বাধ্য হয় ৷

আহমেদে দাবালীয়াপাৰাত উপস্থিত হোৱাৰ লগে লগে ৰাইজৰ তীব্ৰ প্ৰশ্নৰ সম্মুখীন হয় আৰু একাংশ ক্ষুব্ধ কংগ্ৰেছ কৰ্মীৰ ৰোষত পৰে ৷ ক্ষুব্ধ কংগ্ৰেছ কৰ্মীসকলে “ভাৰতীয় জাতীয় কংগ্ৰেছ জিন্দাবাদ, দুৰ্নীতিপৰায়ণ ব্যক্তিক বহিষ্কাৰ কৰক ” আদি ধ্বনি দি সভাস্থলী উত্তাল কৰি তোলে৷

পৰিস্থিতি বিষম দেখি সভাস্থলী ত্যাগ কৰিবলৈ বাধ্য হয় কংগ্ৰেছ নেতা আব্দুৰ ৰহিম আহমেদ ৷ উল্লেখ্য যে, বৃহস্পতিবাৰে বামুণদঙৰাত একে ঘটনাৰ সন্মুখীন হৈ সভাস্থলী ত্যাগ কৰিছিল বাঘবৰৰ বিধায়ক শ্বেৰমাণ আলী আহমেদেও ৷