মুখ্যমন্ত্ৰীয়ে চৰকাৰ চলাব বিচাৰিছে নে প্ৰাইভেট কোম্পানী চলাব বিচাৰিছে? মুখ্যমন্ত্ৰীক উভতি ধৰিলে মীৰা বৰঠাকুৰে
ৰূপজ্যোতি কুৰ্মীৰ বিজেপি গমনক কেন্দ্ৰ কৰি মুখ্যমন্ত্ৰী ড০ হিমন্ত বিশ্ব শৰ্মাই সকলো বিৰোধীকে আওপকীয়াকৈ বিজেপিত যোগদান কৰিবলৈ পৰামৰ্শ দিয়াৰ পাছতে তেওঁক উভতি ধৰিছে কংগ্ৰেছ নেত্ৰী মীৰা বৰঠাকুৰে।
‘মুখ্যমন্ত্ৰীয়ে চৰকাৰ চলাব বিচাৰিছে নে প্ৰাইভেট কোম্পানী চলাব বিচাৰিছে?’ আমাৰ সাংবাদিকৰ আগত এই প্ৰশ্ন কৰি বৰঠাকুৰে লগতে কয় ‘আমি প্ৰাইভেট কোম্পানীৰ চৰকাৰ বিচৰা নাই গণতান্ত্ৰিক চৰকাৰ বিচাৰিছো।‘
বৰঠাকুৰৰ মতে ‘মুখ্যমন্ত্ৰীয়ে যদি সঁচা অৰ্থত গণতন্ত্ৰ বৰ্তাই ৰাখিব বিচাৰিছে বা সুস্থ শাসন দিব বিচাৰিছে তেন্তে বিৰোধীৰ ভুমিকাটো নুই কৰিব নোৱাৰে।‘
মুখ্যমন্ত্ৰীৰ বক্তব্যৰ বিৰোধিতা কৰি বৰঠাকুৰে লগতে কয় ‘তেওঁ যে বিৰোধীক ঠাট্টা-মস্কৰা কৰিছে তেওঁনো কেনেকৈ শাসন চলাব ৰাইজৰ ধনেৰেহে চলাব। কোনে কি দলত যোগদান কৰিব বা শাসক-পক্ষত থাকিব নে বিৰোধীত থাকিব সেয়া সকলোৰে নিজা নিজা সিদ্ধান্ত।‘
‘বিৰোধীলৈ এই আহ্বান কৰাতকৈ ছাত্ৰ-ছাত্ৰীয়ে যে পৰীক্ষা দিব পৰা নাই, জাগীৰোড-কাছাৰ কাগজকল কাৰ্য্যক্ষম কৰা, চিণ্ডিকেট বন্ধ কৰা, শিক্ষকৰ দৰমহা নিয়মীয়াকৰণ কৰা এইবোৰ কাম কৰিব লাগে।‘ মুখ্যমন্ত্ৰীলৈ পৰামৰ্শ দি মীৰা বৰঠাকুৰে এইদৰে কয়।
বৰঠাকুৰৰ প্ৰশ্ন ‘বিৰোধীক ভঙা-পতাত ব্যস্ত থাকিলে মুখ্যমন্ত্ৰীয়ে সুস্থ শাসন ক’ৰ পৰা দিব? গণতন্ত্ৰত ভাল শাসন পাবলৈ হ’লে সৱল বিৰোধী থকাটো বাঞ্চনীয়’।
ইপিনে, এক দেশ এক দলৰ কথা পবিত্ৰ সংবিধানত কেতিয়াও কোৱা নাই বুলি উল্লেখ কৰি বৰঠাকুৰে আৰু কয় ‘মুখ্যমন্ত্ৰীয়ে সংবিধান বিৰোধী কথা কিছুমান কৈ আছে। গতিকে বিৰোধীৰ ভঙা-পতা অংকত ব্যস্ত নাথাকি তেওঁ অসমক ভাৰতৰ ৫ খন সৰ্বশ্ৰেষ্ঠ ৰাজ্যৰ ভিতৰত অন্তৰ্ভুক্ত কৰাত মনোনিৱেশ কৰক।‘