দেশত ক্ৰমান্বয়ে হ্ৰাস পাইছে নেকি বিজেপিৰ জনপ্ৰিয়তা! হ্ৰাস পাইছে নেকি মোদী লহৰৰ কোবাল সোঁত! তেনে এক প্ৰতিচ্ছবিয়ে দেখা গৈছে ৰাজস্থানৰ পঞ্চায়ত নিৰ্বাচনত।
যোৱা আগষ্ট মাহৰ ২৬, ২৯ তাৰিখে আৰু ছেপ্টেম্বৰৰ ১ তাৰিখে ৰাজস্থানত তিনিটা পৰ্যায়ত অনুষ্ঠিত হৈ যায় পঞ্চায়ত নিৰ্বাচন।
ৰাজ্যখনৰ ভাৰতপুৰ, দৌছা, জয়পুৰ, জোধপুৰ, সাৱাই মধুপুৰ আৰু চিৰহি জিলাত ৬ টা জিলা পৰিষদৰ ২০০ সদস্যৰ আসন আৰু ৭৮ টা পঞ্চায়ত সমিতি ১৫৬৪ সদস্যৰ আসনৰ বাবে অনুষ্ঠিত হৈছিল নিৰ্বাচন।
শনিবাৰে পুৱাৰ পৰা ৰাজ্যখনৰ ৬ জিলাত ভোট গণনা আৰম্ভ হৈছে। এই মুহূৰ্তলৈকে ৰাজস্থানৰ শাসনাধিষ্ঠ কংগ্ৰেছ দলে ৬৭০ খন পঞ্চায়ত সমিতিৰ আসনত জয়ী হোৱাৰ বিপৰীতে বিজেপি দলে লাভ কৰিছে মাত্ৰ ৫৫১ খন আসন।
আনহাতে আৰএলপি দলে ৪০খন আৰু বিএছপি-এ লাভ কৰিছে ১১ খন আসন। ২৯০ খন আসনত জয়লাভ কৰিছে নিৰ্দলীয় প্ৰাৰ্থীয়ে।
তদুপৰি এই মুহূৰ্তলৈকে ভোট গণনা সমাপ্ত হোৱা জোধপুৰ জিলা পৰিষদৰ আসন খনতো জয় লাভ কৰিছে কংগ্ৰেছ দলে। অৱশ্যে জিলা পৰিষদৰ ভোটগণনা বৰ্তমানো অব্যাহত আছে।
উল্লেখ্য যে এইবাৰ পঞ্চায়ত নিৰ্বাচনত ৰাজ্যখনত ৬৪.৪০ শতাংশ ভোটাৰে ভোটদান কৰিছিল।
কংগ্ৰেছ দলৰ এই সাফল্যত উৎফুল্লিত হৈ পৰিছে ৰাজ্যখনৰ মুখ্যমন্ত্ৰী অশোক গেহলটৰ লগতে দলৰ নেতা-কৰ্মীসকল।
ৰাজস্থানৰ পঞ্চায়ত নিৰ্বাচনৰ এই সফলতাই দেশৰ ৰাজনীতিত ক্ৰমাৎ দুৰ্বল হৈ অহা কংগ্ৰেছৰ বাবে এক আশাৰ সঞ্চাৰ কৰিছে। অৱশ্যে অনাগত সময়ত দলটোৰ এই ধাৰাবাহিকতা অক্ষুণ্ণ থাকিব নে সেয়া লক্ষণীয় হ’ব।
