লোকসভা নিৰ্বাচনৰ দিন ঘোষণা কৰাৰ লগে লগে অৰুণাচলৰ এগৰাকী কংগ্ৰেছ বিধায়কে দল এৰি বিজেপিত যোগদান কৰা ঘটনাই এতিয়া চিন্তিত কৰি তুলিছে কংগ্ৰেছক। সম্পূৰ্ণ ‘ব্যক্তিগত কাৰণ’ত বিধায়ক মাৰ্কিও টাডোৱে ১১ মাৰ্চত দলৰ প্ৰাথমিক সদস্য পদ ত্যাগ কৰা বুলি জনায়।
ক্ৰা দাডি জিলাৰ টালি বিধানসভা সমষ্টিক প্ৰতিনিধিত্ব কৰা বিধায়ক টাডোৱে কংগ্ৰেছ অধ্যক্ষ টাকাম সঞ্জয়ৰ হাতত পদত্যাগ পত্ৰ প্ৰদান কৰে।
কংগ্ৰেছ ত্যাগ কৰা বিধায়কগৰাকীয়ে এখন সংবাদমেল সম্বোধন কৰি কয়, ‘ৰাজ্যখনৰ ভৱিষ্যতৰ বাবে কংগ্ৰেছৰ কোনো সু দৃষ্টিভংগী নাই। সেয়ে মই মোৰ সমষ্টিবাসী তথা ৰাজ্যখনৰ স্বাৰ্থত বিজেপিত যোগদান কৰিছো’।
‘পেমা খাণ্ডু নেতৃত্বাধীন বিজেপি চৰকাৰৰ দিনত অৰুণাচলৰ উন্নয়ন ক্ষীপ্ৰতাৰে আগবাঢ়িছে’। এইদৰে তাৎপৰ্যমূলক মন্তব্য কৰে কংগ্ৰেছ ত্যাগী বিধায়কগৰাকীয়ে। তেওঁ লগতে আগন্তুক বিধানসভা নিৰ্বাচনত প্ৰতিদ্বন্দ্বিতা নকৰে বুলিও জানিবলৈ দিয়ে। ইয়াৰ বিপৰীতে তেওঁ বিজেপিৰ সম্ভাব্য প্ৰাৰ্থী ঠাজি গিচাক কিওগিক সম্পূৰ্ণৰূপে সহায় আগবঢ়াব।
‘মই মোৰ সমষ্টি তথা সমষ্টিবাসীৰ হিতৰ বাবে আগন্তুক বিধানসভা নিৰ্বাচনত প্ৰতিদ্বন্দ্বিতা নকৰাৰ সিদ্ধান্ত লৈছো। ইয়াৰ বিপৰীতে মই কিওগিক সম্পূৰ্ণৰূপে সহায় কৰিম’। সংবাদমেলতে এই কথা উল্লেখ কৰে টাডোৱে।
উল্লেখ্য যে টাডোৱে প্ৰথমবাৰৰ বাবে ২০০৯ চনত অৰুণাচলৰ পিপ’লছ পাৰ্টীৰ হৈ বিধানসভালৈ নিৰ্বাচিত হৈছিল। তাৰ পিছত তেওঁ ২০১৪ত কংগ্ৰেছৰ হৈ প্ৰতিদ্বন্দ্বিতা কৰি নিৰ্বাচিত হৈছিল বিধানসভালৈ।
মন কৰিবলগীয়া যে টাডোৰ কংগ্ৰেছ ত্যাগৰ ফলত এতিয়া অৰুণাচলত কংগ্ৰেছ বিধায়কৰ সংখ্যা চাৰিজনলৈ হ্ৰাস পালে।
