সততে অভিনৱ ধৰণে প্ৰতিবাদ কৰি অহা মৰিয়নিৰ বিধায়ক ৰূপজ্যোতি কুৰ্মীয়ে আজি বিধানসভাৰ চৌহদতে নিজৰ হাত কাটি তেজেৰে চিঠি লিখাৰ পিছতে নিজৰ এই কামক ভুল বুলি স্বীকাৰ কৰিছে।
তেওঁ নিজৰ ভুল স্বীকাৰেৰে বিধানসভাৰ অধ্যক্ষলৈ এখন পত্ৰ প্ৰেৰণ কৰি “প্ৰতিবাদৰ অন্য পথ ল’ব পৰা গ’ল হেঁতেন” বুলি মন্তব্য কৰে।
আজি কংগ্ৰেছৰ বিধায়কজনে বিধানসভাৰ চৌহদতে নিজৰ হাত কাটি তেজেৰে এখন চিঠি চৰকাৰলৈ লিখিছিল, য’ত পেপাৰ মিলকে ধৰি অসমৰ উদ্যোগবোৰ অসমৰ সম্পদ বুলি কৈ এইবোৰৰ ব্যক্তিগতকৰণৰ বিৰোধিতা কৰাৰ উপৰি অসমীয়াৰ সন্মান বিক্ৰী কৰিবলৈ দিয়া নহ’ব বুলি কয়। চিঠিখন বিধায়ক কুৰ্মীয়ে বিধানসভাৰ চৌহদতে আঁৰি দিয়ে।
ব্লেডেৰে নিজৰ হাত কাটি এইদৰে চিঠি লিখাৰ পিছতে বিধায়কজনক তাৎক্ষণিকভাৱে বিধানসভাৰ চৌহদতে থকা চিকিৎসালয়ত ভৰ্তি কৰা হয়।
আনহাতে এই অভিনৱ প্ৰতিবাদৰ পিছতে তীব্ৰ বিতৰ্কৰ সৃষ্টি হয় আৰু বিধানসভাৰ অধ্যক্ষই বিধায়কজনৰ বিৰুদ্ধে কঠোৰ ব্যৱস্থা লোৱাৰ ইংগিত দিয়ে।
পৰৱৰ্তী সময়ত মৰিয়নি সমষ্টিৰ বিধায়কজনে নিজৰ কামক ভুল পদক্ষেপ হিচাপে দেখা পায় আৰু অধ্যক্ষলৈ ক্ষমাপত্ৰ লিখে।
“মই ভাবো প্ৰতিবাদৰ মই লোৱা পথটো ভুল। মই প্ৰতিবাদ কৰিবলৈ অন্য পদক্ষেপ ল’ব পাৰিলো হেঁতেন”, বিধায়কজনে ক্ষমাপত্ৰখনত লিখে।
তেওঁ ভৱিষ্যতে তেনেকুৱা ভুল নকৰে বুলিও প্ৰতিশ্ৰুতি দিয়ে।
বিধায়কজনক চাৰিদিন পূৰ্বে বিধানসভাৰ অধিৱেশনৰ কাৰ্য্যসূচীৰ পৰা বহিষ্কাৰ কৰা হৈছিল।
