যুদ্ধজয়ী বীৰ-সদৃশ বিপুল আদৰণিৰ মাজত গুৱাহাটীত ভৰি থৈয়েই কংগ্ৰেছ সাংসদ ভুৱনেশ্বৰ কলিতাই উদঙাই দিয়ে নাগৰিকত্ব বিধেয়কক লৈ ৰাজ্যসভা অধিৱেশনৰ শেষ দিনটোলৈকে বিজেপিয়ে চলোৱা “অপপ্ৰচাৰ”।
কলিতাই কয় যে সদ্যসমাপ্ত ৰাজ্যসভা অধিৱেশনৰ অন্তিম দিনটোত বিতৰ্কিত বিধেয়কখন উত্থাপন নকৰাৰ সিদ্ধান্ত আগতীয়াকৈ গ্ৰহণ কৰা হৈছিল, কিন্তু তাৰ পিছতো বিজেপি নেতাসকলে বিধেয়ক উত্থাপন কৰা হ’বই বুলি দেশজুৰি অপপ্ৰচাৰ চলাইছিল।
“কোনো বিবাদিত বিল যাতে উত্থাপন কৰিব নোৱাৰে তাৰ বাবে ৰাজ্যসভাৰ Business advisory committee (কাৰ্য্যক্ৰমণিকা সম্পৰ্কীয় উপদেষ্টা সমিতি)এ সিদ্ধান্ত লৈছিল। কিন্তু তাৰ পাছতো নৰেন্দ্ৰ মোদীকে ধৰি বিজেপি নেতাসকলে বিল উত্থাপন কৰা হ’ব বুলি অপপ্ৰচাৰ চলাই আছিল,” বৃ্হস্পতিবাৰে গুৱাহাটীৰ ৰাজীৱ ভৱনত সংবাদ মেলত মন্তব্য কলিতাৰ।
কেন্দ্ৰীয় গৃহ ৰাজ্য মন্ত্ৰী কিৰেন ৰিজিজুৱেও অধিৱেশনৰ অন্তিম দিনা ৰাজ্যসভাত বিধেয়কখন উত্থাপন কৰা হ’ব বুলি মঙলবাৰে মন্তব্য কৰিছিল।
লগতে পঢ়ক– উঃ-পূবৰ নেতাসকলক বুজাই দিয়া হৈছে, বুধবাৰে উত্থাপিত হ’ব নাগৰিকত্ব বিধেয়ক: ৰিজিজু
অসম প্ৰদেশ কংগ্ৰেছৰো একালৰ সভাপতিজনে লগতে কয় যে সংসদৰ এইখনেই শেষ অধিৱেশন হোৱাৰ বাবে এতিয়া বিধেয়কখনৰ ক্ষেত্ৰত একমাত্ৰ অধ্যাদেশৰ ৰাষ্টা খোলা আছে মোদী চৰকাৰৰ সন্মুখত।
বিধেয়কৰ দৰেই অধ্যাদেশো প্ৰতিহত কৰাৰ বাবে কংগ্ৰেছে আপ্ৰাণ চেষ্টা কৰিব বুলিও জনায় কলিতাই।
বিধেয়কখন “ত্ৰুটিপূৰ্ণ” বুলি উল্লেখ কৰি ৰাজ্যসভাৰ সাংসদজনে লগতে সদৰী কৰে যে উত্থাপনৰ মুহূৰ্ততে ২০১৬ চনতে কংগ্ৰেছে ইয়াৰ বিৰোধিতা কৰিছিল। বিধেয়ক সম্পৰ্কীয় যুটীয়া সংসদীয় সমিতিটো “ত্ৰুটিসমূহ” আঙুলিয়াই দিয়া হৈছিল।
ত্ৰুটিসমূহ এটা এটাকৈ সমিতিত দাখিল কৰা হৈছিল যদিও অধ্যক্ষ, বিজেপি নেতা ৰাজেন্দ্ৰ আগৰৱালাই নিজ দলৰ হেঁচাত সেই পৰামৰ্শসমূহ গ্ৰাহ্য নকৰিলে, যুটীয়া সংসদীয় সমিতিৰ সদস্যৰূপে থকা কলিতাৰ মন্তব্য।
সংবাদমেলখনত উপস্থিত আনজন সাংসদ, প্ৰদেশ কংগ্ৰেছ সভাপতি ৰিপুন বৰাই বিলখন “সমাপ্ত” হৈ গ’ল বুলি উল্লেখ কৰি কয় যে কংগ্ৰেছৰ কাৰণেই এয়া সম্ভৱ হ’ল।
“ৰাহুল গান্ধীয়ে বলিষ্ঠ ভূমিকা লৈছিল। তেওঁৰ নেতৃত্বত কংগ্ৰেছে ৰাজ্যসভাত ৰণকৌশল প্ৰস্তুত কৰিছিল। বিধেয়কখনৰ বিৰুদ্ধে কংগ্ৰেছকে ধৰি ১১৬জন সাংসদ আছিল। বিজেপি আৰু তাৰ অংশীদাৰ আছিল ১১০জন সাংসদ,” বৰাৰ মন্তব্য।
বৰাই লগতে কয় অসমীয়াৰ বিপদত কংগ্ৰেছে অতীতৰে পৰাই বিশেষ ভূমিকা লৈ আহিছে আৰু আগলৈও কেৱল কংগ্ৰেছেহে ৰক্ষা কৰিব জাতিক।
বিধেয়কখনৰ বিৰুদ্ধে বিৰামহীন সংগ্ৰাম চলোৱা আছু, নেছ’, কৃষক মুক্তি সংগ্ৰাম সমিতি, অসম জাতীয়তাবাদী যুৱ ছাত্ৰ পৰিষদ আদি দল-সংগঠনৰ লগতে অক্লান্ত দৃঢ় স্থিতি লোৱা বৰ্ষীয়ান বুদ্ধিজীৱী হীৰেন গোহাঁইক ধন্যবাদ জ্ঞাপন কৰে বৰাই।
