বিগত বৰ্ষৰ ৭ ছেপ্টেম্বৰত কন্যাকুমাৰীৰ পৰা কাশ্মীৰলৈ কংগ্ৰেছে আৰম্ভ কৰা ‘ভাৰত জোডো যাত্ৰা’ৰ এবছৰ পূৰ্ণ হোৱাৰ দিশে আগবাঢ়িছে।
প্ৰায় ৪ হাজাৰ কিলোমিটাৰ সামৰি লোৱা এই যাত্ৰাৰ জৰিয়তে দলটোৱে দেশৰ ৰাজনীতিত পুনৰ সবলভাৱে ঠন ধৰি উঠা বুলি ৰাজনৈতিক বিশেষজ্ঞসকলে মত প্ৰকাশ কৰে।
ভাৰত জোড়ো যাত্ৰাৰ এবছৰীয়া বৰ্ষপূৰ্তি অনন্য ৰূপত আয়োজন কৰিবলৈ পৰিকল্পনা কৰিছে কংগ্ৰেছে। সেই অনুসাৰে ৭ ছেপ্টেম্বৰত সমগ্ৰ দেশতে কংগ্ৰেছে জিলা পৰ্যায়ত যাত্ৰা অনুষ্ঠিত কৰিবলৈ সাজু হৈছে বুলি জানিব পৰা গৈছে।
অৱশ্যে ভাৰত জোড়ো যাত্ৰাৰ বৰ্ষপূৰ্তি উদযাপন হিচাপে আয়োজিত হ’বলগীয়া এই যাত্ৰা কিমান দিনলৈ চলিব তথা অন্যান্য প্ৰাসঙ্গিক দিশসমূহৰ বিষয়ে আলোচনা চলি আছে বুলি দলীয় সূত্ৰই প্ৰকাশ কৰিছে।
উল্লেখ্য যে, ৰাহুৰ গান্ধীৰ নেতৃত্বত কংগ্ৰেছে বিগত বৰ্ষৰ ৭ ছেপ্টেম্বৰত কন্যাকুমাৰীৰ পৰা এই যাত্ৰা আৰম্ভ কৰিছিল। চলিত বৰ্ষৰ ৩০ জানুৱাৰীত গান্ধীয়ে শ্ৰীনগৰত ১৪৫ দিনীয়া এই অভিলাষী যাত্ৰাৰ সামৰণি মাৰে।
যাত্ৰাৰ সময়ছোৱাত গান্ধীয়ে ১২খন ৰাজহুৱা সভা, ১০০খনতকৈও অধিক কৰ্ণাৰ সভা আৰু ১৩খন সংবাদমেলত ভাষণ দিয়ে। এই যাত্ৰাত দলটোৱে দেশজুৰি ব্যাপক গণ সমৰ্থন লাভ কৰিছিল।
মূলত: বিজেপিয়ে সৃষ্টি কৰা অৰ্থনৈতিক বৈষম্য, সামাজিক মেৰুকৰণ আৰু ৰাজনৈতিক একনায়কত্ববাদৰ পৰা গণৰাজ্যখনৰ প্ৰতি হোৱা ভাবুকিৰ বিৰোধিতাৰে এই যাত্ৰা কাৰ্যসূচী গ্ৰহণ কৰা বুলি কংগ্ৰেছে সদৰী কৰিছিল।
লগতে বিজেপিয়ে দেশত সাম্প্ৰদায়িকতাৰ বিদ্বেষ বিয়পাই দিয়া বুলি অভিযোগ কৰি বিজেপিৰ এই ঘৃণাৰ বজাৰত প্ৰেম বিক্ৰী কৰিছে বুলি ৰাহুল গান্ধীয়ে মন্তব্য কৰিছিল।
