নৰেন্দ্ৰ মোডীৰ শপত গ্ৰহণ অনুষ্ঠানত অংশগ্ৰহণ কৰিব মল্লিকাৰ্জুন খাৰ্গেই। কংগ্ৰেছ শিবিৰৰ মতে, ৰাষ্ট্ৰপতি ভৱনত শপতগ্ৰহণ অনুষ্ঠানত অংশগ্ৰহণ কৰিবলৈ কংগ্ৰেছ সভাপতিগৰাকীক আমন্ত্ৰণ জনোৱা হৈছে। মল্লিকাৰ্জুন খাৰ্গেই সৌজন্যতাৰ খাতিৰতে এই অনুষ্ঠানত অংশগ্ৰহণ কৰিব।
বাতৰি অনুসৰি, ইণ্ডিয়া ব্লকৰ অন্যান্য অংশগ্ৰহণকাৰী দলৰ নেতৃত্বৰ সৈতে আলোচনা কৰি খাৰ্গৰ উপস্থিতিৰ সিদ্ধান্ত লোৱা হৈছে। প্ৰথমতে কংগ্ৰেছৰ কাৰ্যকৰী সমিতিৰ বৈঠকৰ পাছত জয়ৰাম ৰমেশ আৰু কে চি ভেনুগোপালে জনাইছিল যে কংগ্ৰেছলৈ কোনো নিমন্ত্ৰণ পত্ৰ অহা নাই। নিমন্ত্ৰণ আহিলে ইণ্ডিয়া ব্লকে সিদ্ধান্ত লৈ পদক্ষেপ গ্ৰহণ কৰিব।
অৱশ্যে কংগ্ৰেছে শপত গ্ৰহণ অনুষ্ঠানত অংশগ্ৰহণ কৰিলেও দেওবাৰে সন্ধিয়া তৃণমূল কংগ্ৰেছৰ কোনো প্ৰতিনিধি ৰাষ্ট্ৰপতি ভৱনলৈ নাযায়। লোকসভাত তৃণমূল দলৰ নেতা সুদীপ বেনাৰ্জীয়ে জনায় যে প্ৰহ্লাদ যোশীয়ে তেওঁক ফোন কৰিছিল। নিমন্ত্ৰণো দিয়া হৈছে। অৱশ্যে দলটোৱে এই অনুষ্ঠানলৈ নোযোৱাৰ সিদ্ধান্ত লৈছে।
লগতে পঢ়কঃ দিল্লীৰ চৰকাৰী বিদ্যালয়ৰ জয়জয়ময়ময় অৱস্থা; নীটত উত্তীৰ্ণ হ’ল চৰকাৰী স্কুলৰ ১৪১৪গৰাকী শিক্ষাৰ্থী
আনহাতে, দিল্লীত আজি আড়ম্বৰপূৰ্ণ শপত গ্ৰহণ অনুষ্ঠান। সন্ধিয়া ৭.১৫ বজাত প্ৰধানমন্ত্ৰী হিচাপে নৰেন্দ্ৰ মোডীৰ লগতে কেন্দ্ৰীয় কেবিনেটৰ আন সদস্যসকলে শপত গ্ৰহণ কৰিব। ৰাষ্ট্ৰপতি দ্ৰৌপদী মুৰ্মুৱে প্ৰধানমন্ত্ৰী আৰু কেন্দ্ৰীয় মন্ত্ৰী পৰিষদৰ অন্যান্য সদস্যসকলক শপত বাক্য পাঠ কৰাব।
ইতিমধ্যে বাংলাদেশৰ প্ৰধানমন্ত্ৰী শ্বেখ হাছিনা এই অনুষ্ঠানত অংশগ্ৰহণৰ বাবে দিল্লীত আহি উপস্থিত হৈছে। শ্ৰীলংকা, মালদ্বীপ, মৰিচাছ, ভূটান, নেপালৰ ৰাষ্ট্ৰনেতাসকলো তাত উপস্থিত থাকিব।
নৰেন্দ্ৰ মোডীৰ শপত গ্ৰহণ অনুষ্ঠানলৈ আমন্ত্ৰিত হৈছে চেন্ট্ৰেল ভিষ্টা প্ৰকল্পত নিযুক্ত কৰ্মীসকলক। আজিৰ অনুষ্ঠানত বন্দে ভাৰত নিৰ্মাণৰ কৰ্মীসকলো উপস্থিত থাকিব। ইয়াৰ উপৰিও উত্তৰাখণ্ড সুৰংগ দুৰ্যোগৰ পৰা ৰক্ষা পোৱা শ্ৰমিকসকলক আমন্ত্ৰণ জনোৱা হৈছে। সুৰংগটোৰ পৰা আৱদ্ধ শ্ৰমিকসকলক উদ্ধাৰ কৰা ৰেট হোল খননকাৰীসকলকো আমন্ত্ৰণ জনোৱা হৈছে। মুঠ আঠ হাজাৰ অতিথি উপস্থিত থাকিব।
এই অনুষ্ঠানটো ৰাষ্ট্ৰপতি ভৱনৰ অফিচিয়েল ইউটিউব চেনেলৰ লগতে নৰেন্দ্ৰ মোডীৰ অফিচিয়েল ছ’চিয়েল মিডিয়া প্লেটফৰ্ম আৰু দূৰদৰ্শনত লাইভ সম্প্ৰচাৰ কৰা হ’ব।
