প্ৰথম পৰ্যায়ৰ লোকসভা নির্বাচনলৈ মাজত মাথো দুটা সপ্তাহ বাকী থকা অৱস্থাত ৰাজনৈতিক দলবোৰৰ মাজত বৃদ্ধি পাইছে তৎপৰতা। ভোটাৰ ৰাইজৰ মন জিনিবলৈ আয়োজন কৰিছে বিশাল জনসভাৰ লগতে প্ৰস্তুত কৰিছে বিভিন্ন ৰণ কৌশল। ঠিক সেই উদ্দেশ্যে আগত লৈয়ে অহা ৩ এপ্ৰিলত অসমলৈ আহিব কংগ্ৰেছৰ ৰাষ্ট্ৰীয় অধ্যক্ষ ৰাহুল গান্ধী।
কংগ্ৰেছ দলৰ এক বিশেষ সূত্ৰই জানিবলৈ দিয়া অনুসৰি ৰাহুল গান্ধীয়ে উক্ত দিনটোত কংগ্ৰেছৰ হৈ অসমত দুখন বিশাল জনসভাত ভাষণ প্ৰদান কৰিব।
কংগ্ৰেছৰ অধ্যক্ষগৰাকীয়ে প্ৰথমে কলিয়াবৰ সমষ্টিৰ কংগ্ৰেছ প্ৰাৰ্থী তথা সাংসদ গৌৰৱ গগৈৰ হৈ আৰু দ্বিতীয়তে লখিমপুৰ সমষ্টিৰ কংগ্ৰেছ প্ৰাৰ্থী অনিল বৰগোহাঁইৰ হৈ প্ৰচাৰ কাৰ্যত অংশ ল’ব।
ইয়াৰ উপৰি পৰৱৰ্তী পৰ্যায়তো ৰাষ্ট্ৰীয় অধ্যক্ষগৰাকীয়ে অসমৰ বিভিন্ন সমষ্টিত দলৰ হৈ নিৰ্বাচনী প্ৰচাৰ চলাব বুলি বিৰোধী দলটোৰ সূত্ৰই জানিবলৈ দিয়ে।
উল্লেখ্য যে অসমত অহা ১১ এপ্ৰিল, ১২ এপ্ৰিল আৰু ২৩ এপ্ৰিলত তিনিটা পৰ্যায়ত অনুষ্ঠিত হ’ব লগীয়া নিৰ্বাচনৰ বাবে প্ৰচাৰ চলাবলৈ কংগ্ৰেছে ৪০ গৰাকীকৈ ষ্টাৰ কেম্পেইনাৰৰ এখন তালিকাও ইতিমধ্যে প্ৰকাশ কৰিছে।
কংগ্ৰেছৰ এই ষ্টাৰ কেম্পেইনাৰৰ তালিকাত দলটোৰ ৰাষ্ট্ৰীয় সভাপতি ৰাহুল গান্ধীৰ উপৰি আছে প্ৰাক্তন প্ৰধান মন্ত্ৰী মনমোহন সিং, ছোনিয়া গান্ধী, প্ৰিয়ংকা গান্ধী ভদ্ৰা, গোলাম নবী আজাদ, আহমেদ পেটেল, আনন্দ শৰ্মা, নৱজোৎ সিং সিদ্ধু, আজাহাৰউদ্দিন, তৰুণ গগৈ, হৰিশ ৰাৱাট আৰু ৰিপুন বৰা আদিৰ দৰে ৰাজনীতিকৰ নাম।