মানহানিৰ গোচৰত দোষী সাব্যস্ত হোৱাৰ পিছত শুকুৰবাৰে কংগ্ৰেছ নেতা ৰাহুল গান্ধীৰ লোকসভাৰ সদস্য পদ খাৰিজ কৰাক কেন্দ্ৰ কৰি শাসকীয় বিজেপি দলক কঠোৰ সমালোচনা কৰিছে কংগ্ৰেছ দলে। আদানী কেলেংকাৰীৰ বিৰুদ্ধে সোচ্চাৰ হোৱাৰ বাবে ভাৰত জোড়ো যাত্ৰাৰ সফলতাৰ বাবেই ৰাহুল গান্ধীয়ে মূল্য দিবলগীয়া হৈছে বুলি অভিযোগ কৰিছে কংগ্ৰেছে।
কংগ্ৰেছ দলে লগতে এই যুঁজখন ৰাহুল গান্ধীৰ ‘কৌশিশ’ অৰ্থাৎ প্ৰয়াস বনাম প্ৰধানমন্ত্ৰী মোদীৰ ‘সাজিছ’ অৰ্থাৎ ষড়যন্ত্ৰৰ মাজত বুলি দাবী কৰে। দলৰ জেষ্ঠ্য নেতা জয়ৰাম ৰমেশে কয় যে ভাৰত জোড়ো যাত্ৰাই দলৰ কৰ্মীসকলক উৎসাহী কৰি তুলিছিল আৰু ভৱিষ্যতৰ বাবে পথ দেখুৱাইছিল। সেয়ে এই যাত্ৰাক লৈ বিজেপিয়ে ভয় খোৱা বা আতংকিত হোৱাটো স্পষ্ট বুলি দাবী কৰে ৰমেশে।
দিল্লীস্থিত কংগ্ৰেছৰ মুখ্য কাৰ্যালয়ত এক সংবাদ মেলত জয়ৰাম ৰমেশে ৰাহুল গান্ধীক চুৰাটৰ আদালতে দোষী সাব্যস্ত কৰা আৰু পৰৱৰ্তী সময়ত তেওঁক সাংসদ হিচাপে অযোগ্য ঘোষণা কৰাটো আইনী সমস্যাৰ লগতে ৰাজনৈতিক বিষয়ো বুলি পুনৰ দোহাৰে। তেওঁ কয়, ‘মাহৰ পিছত মাহ ধৰি বিজেপিয়ে ভাৰত জোড়ো যাত্ৰাক বদনাম কৰিবলৈ চেষ্টা চলাইছিল।”
“ভাৰত জোডো যাত্ৰাৰ সফলতাৰ মূল্য দিবলগীয়া হৈছে ৰাহুল গান্ধীয়ে। ২০১৪ চনৰ পৰা ৰাহুল গান্ধীয়ে সংসদৰ ভিতৰত আৰু বাহিৰত মোডী চৰকাৰৰ নীতিৰ বিৰুদ্ধে মাত মাতি আহিছে। এতিয়া তেওঁ আদানী মেগা কেলেংকাৰীৰ বাবেও মূল্য দিবলগীয়া হৈছে।”– ৰমেশে লগতে কয়। তেওঁ লগতে আদানী বিষয়ত বিৰোধীৰ ঐক্যই বিজেপিক ক্ষুব্ধ কৰি তুলিছে বুলিও দাবী কৰে।
“সংসদত ৰাহুল গান্ধীৰ ৫০ মিনিটৰ ভাষণৰ পিছৰে পৰা ৫ ফেব্ৰুৱাৰীৰ পৰা ১৫ টা দল একত্ৰিত হৈ যুটীয়া সংসদীয় সমিতিৰ আহ্বান জনোৱাৰ কাৰ্যই বিজেপিক ভয় খুৱাইছে। ৰাহুল গান্ধীয়ে ইয়াৰ বাবে মূল্য পৰিশোধ কৰিবলগীয়া হৈছে, কিয়নো বিজেপিয়ে আদানী বিষয়ৰ পৰা জনসাধাৰণক আঁতৰাই আনিব বিচাৰিছে।”– জেষ্ঠ্য কংগ্ৰেছ নেতাগৰাকীয়ে লগতে কয়।
