শনিবাৰে পুৱা দক্ষিণৰ দুই কংগ্ৰেছ নেতা ডি কে শিৱকুমাৰ আৰু সিদ্দাৰামায়াক একেলগে মুখ্যমন্ত্ৰীৰ চৰকাৰী বাসভৱন ‘কাৱেৰী’ত ব্ৰেকফাষ্ট টেবুলত দেখা গ’ল। কংগ্ৰেছে সেই ছবিখন ছ’চিয়েল মিডিয়াত প্ৰকাশ কৰিছিল। প্ৰশ্ন হয়, কংগ্ৰেছে সঁচাকৈয়ে কৰ্ণাটকৰ সংঘাত সমাধান কৰিবলৈ সক্ষম হৈছেনে? নেতা দুজনে কি কৈছে?
শনিবাৰে ব্ৰেকফাষ্ট টেবুলত আলোচনাৰ অন্তত দুয়োগৰাকী নেতাই এক বিবৃতি প্ৰকাশ কৰে। তাত সিদ্দাৰামায়া আৰু শিৱকুমাৰ দুয়োজনেই সকলো সংঘাতক নাকচ কৰি ঐক্যৰ কথা কয়। লগতে হাইকমাণ্ডৰ নিৰ্দেশক সন্মান জনোৱা হ’ব বুলিও কয়। দুয়োগৰাকী নেতাৰ বৈঠকৰ অন্তত কৰ্ণাটকৰ মুখ্যমন্ত্ৰী সিদ্দাৰমাইয়াই সংবাদমেলত কয়, “আমাৰ এজেণ্ডা ২০২৮ চনৰ নিৰ্বাচন। আমি এই বিষয়টো আলোচনা কৰিলোঁ। ২০২৮ চনৰ নিৰ্বাচনত কংগ্ৰেছক পুনৰ ক্ষমতালৈ অনাৰ বিষয়ে আলোচনা কৰিলোঁ। আমি একেলগে কাম কৰিম। আমাৰ মাজত কোনো সংঘাত নাই, আৰু ভৱিষ্যতও নাথাকিব।” সিদ্দাৰামায়াই লগতে কয় যে কংগ্ৰেছে হাইকমাণ্ডৰ নিৰ্দেশ মানি চলিব। বিৰোধী দল বিজেপিৰ অনাস্থা প্রস্তাৱৰ প্রত্যাহ্বানো খাৰিজ কৰে মুখ্যমন্ত্রীয়ে৷
ডি কে শিৱকুমাৰে সিদ্দাৰামায়াৰ সংবাদমেলত যোগদান কৰে। মুখ্যমন্ত্রীৰ সুৰত তেওঁ কয়, “ৰাজ্যক কোনে নেতৃত্ব দিব সেই সন্দৰ্ভত হাইকমাণ্ডৰ নিৰ্দেশনা আমি পালন কৰিম। আমি দলৰ নিষ্ঠাবান কৰ্মী। আমি জানো যে দেশখন বেয়া সময়ৰ মাজেৰে পাৰ হৈ আছে, আৰু ইয়াৰ মাজতে দলটোৱে যুঁজিব লাগিব। এই সময়ছোৱাত কৰ্ণাটক গুৰুত্বপূৰ্ণ ভূমিকা পালন কৰিব। ২০২৮ চনত আমি পুনৰ ক্ষমতালৈ আহিম। অনাগত দিনত মল্লিকাৰ্জুন খাৰ্গে আৰু ৰাহুল গান্ধীৰ নেতৃত্বত আমি আগবাঢ়ি যাম।”
সূত্ৰ অনুসৰি সিদ্দাৰামায়াই মুখ্যমন্ত্ৰীৰ পদৰ পৰা তৎক্ষণাত পদত্যাগ কৰিব নালাগিব। অৱশ্যে ক্ৰমান্বয়ে ক্ষমতা গতাই দিব। এতিয়াৰ বাবে মন্ত্ৰীসভাৰ সালসলনিত ডি কেৰ অনুগামীসকলক ভাল মন্ত্ৰালয় দিয়া হ’ব। আগৰ তুলনাত বৃদ্ধি কৰা হ’ব এই সংখ্যা। কেৱল সেয়াই নহয়, প্ৰদেশ কংগ্ৰেছৰ সভাপতি আৰু উপ-মুখ্যমন্ত্ৰীৰ দুয়োটা পদতে ডি কে অব্যাহত থাকিব। এই ব্যৱস্থা আগন্তুক কেইমাহমানলৈ চলি থাকিব। তেতিয়াহে চকী সলনি কৰাৰ সম্ভাৱনা আছে। ফেব্ৰুৱাৰীৰ বাজেটৰ পিছত মুখ্যমন্ত্ৰীৰ চকীত বহিব পাৰিব ডি কে। সেই সময়ত পুনৰ বিপৰীত ব্যৱস্থা হ’ব। তেতিয়া সিদ্দাৰামায়াৰ অনুগামীৰ কোনো এজন প্ৰদেশ কংগ্ৰেছৰ সভাপতিৰ চকীত বহিব। বেছিভাগ মন্ত্ৰালয়ো তেওঁৰ অনুগামীৰ হাততে থাকিব।
এদিন পূৰ্বে ডি কেয়ে ছোনিয়া গান্ধীৰ উদাহৰণ দি এই বাৰ্তা দিছিল, “ছোনিয়া গান্ধীয়েও প্ৰধানমন্ত্ৰী হোৱাৰ সুযোগ পাইছিল। কিন্তু তেওঁ সেই সুযোগ গ্ৰহণ কৰা নাছিল, তেওঁ নিজকে বলিদান দিছিল।” কৰ্ণাটকৰ উপ-মুখ্যমন্ত্ৰীয়ে কয়, “২০০৪ চনত লোকসভা নিৰ্বাচনৰ পিছত যেতিয়া তেতিয়াৰ ৰাষ্ট্ৰপতি আব্দুল কালামে ছোনিয়া গান্ধীক ভাৰতৰ প্ৰধানমন্ত্ৰীৰ পদৰ প্ৰস্তাৱ দিছিল। কিন্তু তেওঁ সেই প্ৰস্তাৱ মানি লোৱা নাছিল।”
তেওঁ নিজে প্ৰধানমন্ত্ৰী হোৱাৰ পৰিৱৰ্তে মনমোহন সিঙক সেই প্ৰস্তাৱ আগবঢ়াইছিল। পেছাত তেওঁ এজন অৰ্থনৈতিক বিশেষজ্ঞ। তেওঁ অনুভৱ কৰিছিল যে তেওঁ দেশৰ উন্নয়নৰ বাবে আটাইতকৈ যোগ্য ব্যক্তি। ছোনিয়া গান্ধীয়ে প্ৰধানমন্ত্ৰীৰ পদ এৰি প্ৰায় ২০ বছৰ ধৰি কংগ্ৰেছৰ সভানেত্ৰী হিচাপে কাৰ্যনিৰ্বাহ কৰিছিল।
