মুখ্য নিৰ্বাচন আয়ুক্ত জ্ঞানেশ কুমাৰৰ অপসাৰণৰ দাবীত আজি গুৱাহাটীত উত্তাল প্ৰতিবাদ সাব্যস্ত কৰে অসম প্ৰদেশ কংগ্ৰেছ কমিটীয়ে। ৰাজীৱ ভৱনৰ পৰা ৰাজ্যিক মুখ্য নিৰ্বাচনী বিষয়াৰ কাৰ্যালয়লৈ সমদল উলিয়াবলৈ চেষ্টা কৰাৰ সময়তে আৰক্ষীয়ে প্ৰতিবাদী সমদলত বাধা দিয়ে। ইয়াৰ পিছতে প্ৰদেশ কংগ্ৰেছৰ সভাপতি তথা লোকসভাৰ বিৰোধী উপ-দলপতি গৌৰৱ গগৈসহ কেইবাগৰাকীও নেতা-কৰ্মীক আৰক্ষীয়ে আটক কৰে।
প্ৰতিবাদস্থলীত কংগ্ৰেছ নেতা-কৰ্মীসকলে বিভিন্ন শ্ল’গানেৰে পৰিৱেশ উত্তাল কৰি তোলে। “ভোট চোৰ, গাদ্দী ছোড়”, “জ্ঞানেশ কুমাৰ মুৰ্দাবাদ”, “জ্ঞানেশ কুমাৰ পদত্যাগ কৰক”, “মোদী চৰকাৰ হুঁচিয়াৰ”, “বিজেপি গ’ বেক” আদি শ্ল’গানেৰে প্ৰতিবাদকাৰীসকলে ৰাজপথ কঁপাই তোলে। নিৰ্বাচন আয়োগৰ বিৰুদ্ধেও বিভিন্ন শ্ল’গান দি প্ৰতিবাদকাৰীসকলে ক্ষোভ প্ৰকাশ কৰে।
আৰক্ষীয়ে বেৰিকেড দি সমদল ৰোধ কৰাৰ চেষ্টা কৰাত প্ৰতিবাদকাৰী আৰু আৰক্ষীৰ মাজত হতাহতিৰ সৃষ্টি হয়। এই সময়তে গৌৰৱ গগৈক আৰক্ষীয়ে আটক কৰি গাড়ীত তুলি নিয়ে। তেওঁৰ লগতে এআইচিচিৰ সম্পাদক মনোজ চৌহান, প্ৰদেশ কংগ্ৰেছৰ সাধাৰণ সম্পাদক শান্তনু বৰা, উদিত ভানু দাস, সেৱা দলৰ সভাপতি দ্বীপ বায়ন, বিদিশা নেওগ, মৌচুমী নেওগ, তাজিকা পাৰবিন, মইনাজান বেগম, গোলাম মুস্তাক ওছমানি, অংকুৰ ৰাজ গগৈ, দিগন্ত লস্কৰ, জোন ৰাজখোৱা আৰু আনোৱাৰ হুছেইনকে ধৰি বহু নেতা-কৰ্মীক আৰক্ষীয়ে আটক কৰে।
আজিৰ প্ৰতিবাদী কাৰ্যসূচীত অসম বিধানসভাৰ বিৰোধী দলপতি ৱাজেদ আলী চৌধুৰী, জ্যেষ্ঠ কংগ্ৰেছ নেতা দেৱব্ৰত শইকীয়া, ৰিপুন বৰা, আব্দুল খালেক, নীলমণি সেন ডেকা, প্ৰণতি ফুকন, দিগন্ত বৰ্মন, নন্দিতা দাস, প্ৰদ্যুৎ ভূঞা, কামৰূপ জিলা কংগ্ৰেছৰ সভাপতি প্ৰাণজিৎ চৌধুৰী, মুখপাত্ৰ গোপাল শৰ্মাকে ধৰি বহু নেতা-কৰ্মীয়ে অংশগ্ৰহণ কৰে। কংগ্ৰেছে আৰক্ষীৰ এই কাৰ্যৰ তীব্ৰ গৰিহণা দি ইয়াক গণতান্ত্ৰিক অধিকাৰৰ ওপৰত হস্তক্ষেপ বুলি অভিযোগ কৰে।
সংবাদ মাধ্যমৰ আগত গৌৰৱ গগৈয়ে মুখ্য নিৰ্বাচন আয়ুক্ত জ্ঞানেশ কুমাৰৰ বিৰুদ্ধে তীব্ৰ অভিযোগ উত্থাপন কৰে। তেওঁৰ অভিযোগ অনুসৰি, নিৰ্বাচন আয়োগে বিজেপিৰ তথ্য-প্ৰযুক্তি শাখাৰ দৰে কাম কৰি ভোটাৰ তালিকাৰ পৰা বহু লোকৰ নাম কৰ্তন কৰিছে। বিশেষকৈ নতুনকৈ ১৮ বছৰত ভৰি দিয়া যুৱ ভোটাৰসকলক লৈও তেওঁ গুৰুতৰ অভিযোগ উত্থাপন কৰে। ভোটাৰ তালিকাত নাম অন্তৰ্ভুক্ত কৰাৰ প্ৰক্ৰিয়াত জটিলতা সৃষ্টি কৰি নৱপ্ৰজন্মক ভোটাধিকাৰৰ পৰা বঞ্চিত কৰাৰ চেষ্টা চলিছে বুলি গগৈয়ে অভিযোগ কৰে।
জ্ঞানেশ কুমাৰৰ বিৰুদ্ধে উত্থাপিত অভিযোগৰ নিৰপেক্ষ পৰ্যালোচনা আৰু তেওঁৰ কাৰ্যকালত লোৱা সিদ্ধান্তসমূহ পুনৰীক্ষণৰ দাবীও উত্থাপন কৰে কংগ্ৰেছে। গৌৰৱ গগৈয়ে কয় যে আৰক্ষীৰ লাঠী, গুলী বা ক্ষমতাৰ ব্যৱহাৰে কংগ্ৰেছৰ প্ৰতিবাদ বন্ধ কৰিব নোৱাৰে। গণতন্ত্ৰ আৰু ভোটাধিকাৰ সুৰক্ষাৰ দাবীত আন্দোলন অব্যাহত থাকিব বুলি তেওঁ স্পষ্ট কৰি দিয়ে।
গৌৰৱ গগৈয়ে আৰু কয় যে মুখ্য নিৰ্বাচন আয়ুক্ত জ্ঞানেশ কুমাৰক অপসাৰণ নকৰালৈকে আৰু নিৰ্বাচন আয়োগক মুক্ত, নিকা আৰু বিশ্বাসযোগ্য কৰাৰ ব্যৱস্থা নোলোৱালৈকে কংগ্ৰেছৰ আন্দোলন অব্যাহত থাকিব। সংবিধান, গণতান্ত্ৰিক অধিকাৰ আৰু সাধাৰণ মানুহৰ ভোটাধিকাৰ ৰক্ষাৰ বাবে এই সংগ্ৰাম আগলৈও চলি যাব বুলি তেওঁ ঘোষণা কৰে।
