জনীয়া সমষ্টিৰ উপ নিৰ্বাচনৰ ফলাফলত এ আই য়ু ডি এফৰ ড° হাফিজ ৰফিকুল ইছলাম বৃহৎ ভোটৰ ব্যৱধানত জয়ী হবলৈ সক্ষম হৈছে ৷
ৰফিকুল ইছলামে তেওঁৰ নিকটতম প্ৰতিদ্বন্দ্বী কংগ্ৰেছৰ ছামচুল হকক প্ৰায় ৩৫ হাজাৰৰো অধিক ভোটৰ ব্যৱধানত পৰাজিত কৰি বিধায়ক নিৰ্বাচিত হয় ৷
বৰপেটা চৰকাৰী উচ্চতৰ মাধ্যমিক বিদ্যালয়ত অনুষ্ঠিত ভোট গণনাৰ ফলাফল অনুসৰি এ আই ইউ ডি এফৰ ৰফিকুল ইছলামে ৮১,৭৬৪ টা ভোট লাভ কৰাৰ বিপৰীতে তেওঁৰ নিকটতম প্ৰতিদ্বন্দী কংগ্ৰেছৰ ছামচুল হকে লাভ কৰে ৪৬,৬৩৪ টা ভোট ৷
এ আই য়ু ডি এফৰ ৰফিকুল ইছলামে কংগ্ৰেছৰ ছামচুল হকক ৩৫,১৩০ টা ভোটৰ ব্যৱধানত পৰাজিত কৰি জনীয়াৰ বিধায়ক নিৰ্বাচিত হয় ৷
আনহাতে, বিজেপিৰ তৌফিকুৰ ৰহমানে লাভ কৰে ১৫,৩৪৮ টা ভোট ৷ ফলাফল অনুসৰি অন্যান্য প্ৰাৰ্থী ক্ৰমে চি পি আই(এম)ৰ ৰুস্তম আলীয়ে ২৫৭২ টা, ৰফিকুল ইছলামে ১০০৭ টা, চান্দ মামুদে ৯১০ টা, আব্দুল জলিল তালুকদাৰে ৬৪৩ টা, সুভাষ সুত্ৰধৰে ৫৬৮ টা আৰু ফাৰুক খানে ৩৪৮ টা ভোট লাভ কৰে ৷ ন’টাত পৰে ৬৪৮ টা ভোট ৷
লক্ষণীয় যে, বিগত বিধানসভাৰ নিৰ্বাচনতকৈ এইবাৰৰ নিৰ্বাচনত কংগ্ৰেছ দলে সমষ্টিটোত প্ৰায় চল্লিশ হাজাৰ ভোট কম পায়৷
ইপিনে এই ফলাফলৰ পাছতে নৱ নিৰ্বাচিত বিধায়ক ৰফিকুল ইছলামে সংবাদ মাধ্যমৰ জৰিয়তে সমষ্টিবাসীৰ প্ৰতি ধন্যবাদ আৰু কৃতজ্ঞতা জনায় ৷
তেওঁ কয় যে, বিধায়ক হিচাপে তেওঁ মাথোঁ ডেৰ বছৰহে সময় পাব ৷ এই সময়ছোৱাত সমষ্টিটোৰ উন্নয়নৰ বাবে বিধানসভাৰ ভিতৰে বাহিৰে তেওঁ সম্পূৰ্ণ চেষ্টা চলাব ৷
সৰ্বানন্দ সোণোৱাল যিহেতু অসমৰ মুখ্য মন্ত্ৰী সেয়ে জনীয়াৰ সৰ্বতোপ্ৰকাৰৰ উন্নয়নৰ বাবে মুখ্য মন্ত্ৰী গৰাকীয়ে চেষ্টা চলাব বুলি তেওঁ আশা প্ৰকাশ কৰে ৷
নিৰ্বাচনী ফলাফল ঘোষণা কৰাৰ পাছতে এ আই য়ু ডি এফৰ কৰ্মীসকলে ফটকা ফুটাই আনন্দত মতলীয়া হয় ৷ জিলা কাৰ্যালয়তো নেতা-কৰ্মীসকলৰ যথেষ্ট ভিৰ পৰিলক্ষিত হয় ৷
