অসম বিধানসভাৰ শীতকালীন অধিৱেশনৰ শেষ দিনা শনিবাৰে তেজপুৰ কেন্দ্ৰীয় বিশ্ববিদ্যালয়ৰ অচলাৱস্থাৰ বিষয়ে আলোচনা কৰিবলৈ কংগ্ৰেছৰ বিধায়কসকলে শূন্যকালীন ঘণ্টাত প্ৰস্তাৱ দিছিল। কিন্তু অধ্যক্ষই বিৰোধী দলক পৰ্যাপ্ত সময় নিদিয়াত সকলো কংগ্ৰেছ বিধায়কে সদন ত্যাগ কৰে।
বিৰোধী দলপতি দেৱব্ৰত শইকীয়াই সংবাদ মাধ্যমক সম্বোধন কৰি কয় যে, “বিগত ৭০ দিন ধৰি তেজপুৰ কেন্দ্ৰীয় বিশ্ববিদ্যালয়ত অৰাজকতা বিৰাজ কৰি আছে। পূৰ্বতে জুবিন গাৰ্গৰ মৃত্যুৰ পিছত শোক দিৱস পালনৰ অনুমতি প্ৰদান কৰাৰ পাছত বিশ্ববিদ্যালয়খনত নিয়মীয়াকৈ কাম চলিছিল বুলি কোৱা হৈছিল। কিন্তু এতিয়া ব্যাপক দুৰ্নীতিৰ অভিযোগ উঠিছে। ৰাজ্যপালে দিয়া তদন্তৰো কোনো ফলাফল ওলোৱা নাই। আমি এইসমূহ বিষয়ৰ ওপৰত আলোচনা কৰিব বিচাৰিছিলোঁ, কিন্তু সুবিধা নিদিয়াৰ বাবে সদন ত্যাগ কৰিছোঁ।”
শইকীয়াই আনহাতে ছয় জনগোষ্ঠীৰ জনজাতিকৰণৰ প্ৰস্তাৱৰ প্ৰসংগতো চৰকাৰৰ ওপৰত অভিযোগ আনে। তেওঁ কয়, “বিজেপি চৰকাৰে জনজাতিকৰণৰ বিষয়ত আভুৱা ভাৰি আছে। অধিৱেশনৰ অন্তিম দিনা আলোচনা নহ’লে যাতে কোনো প্ৰস্তাৱ গৃহীত নহয়, সেই উদ্দেশ্যে চৰকাৰে এই কাৰ্যসূচীৰ অন্তিম তালিকাত অন্তৰ্ভুক্ত কৰিছে। যাতে কোনোৱে বক্তব্য ৰাখিব নোৱাৰে।”
কংগ্ৰেছৰ বিধায়ক মনোৰঞ্জন তালুকদাৰে সদন ত্যাগ কৰাৰ পিছত কয় যে, “তেজপুৰ কেন্দ্ৰীয় বিশ্ববিদ্যালয়ৰ অৰাজকতাৰ প্ৰসংগত আমি আলোচনা বিচাৰিছিলোঁ, কিন্তু অনুমতি নিদিয়াৰ বাবে সদন ত্যাগ কৰিছোঁ। অসম চুক্তিৰ আধাৰত স্থাপিত এই বিশ্ববিদ্যালয়খনত শিক্ষাৰ্থীসকলৰ ভৱিষ্যতৰ প্ৰতি লক্ষ্য ৰাখি অসম চৰকাৰে তৎক্ষণাৎ হস্তক্ষেপ কৰা উচিত। আমাৰ শিক্ষাৰ্থীসকলৰ আন্দোলনৰ প্ৰতি সম্পূৰ্ণ সমৰ্থন আছে।”
