আদালতৰ ৰায়ক অৱমাননা কৰাৰ গুৰুতৰ অভিযোগ উত্থাপিত হৈছে গুৱাহাটী কেন্দ্ৰীয় কাৰাগাৰৰ বিৰুদ্ধে।
চান্দমাৰিস্থিত NIAৰ আদালতে আজি ছাত্ৰ মুক্তিৰ মানস কোঁৱৰৰ জামিন মঞ্জুৰ কৰিছিল।
কিন্তু জামিন মঞ্জুৰ কৰাৰ পাছতো মুকলি আকাশৰ তললৈ আহিব নোৱাৰিলে ছাত্ৰ মুক্তি সংগ্ৰাম সমিতিৰ কাৰ্যকৰী সভাপতিগৰাকী।
কণ্টেইনমেণ্ট জ’নৰ দোহাই দি মানসক কাৰাবন্দী কৰি ৰখাৰ গুৰুতৰ অভিযোগ কৃষক মুক্তি সংগ্ৰাম সমিতিৰ।
জিলা উপায়ুক্তৰ নিৰ্দেশ অবিহনে মানস কোঁৱৰক মুক্তি দিয়াত অমান্তি কাৰাগাৰ কৰ্তৃপক্ষ।
আদালতে ৰায় দিয়াৰ পাছত পুনৰ জিলা উপায়ুক্তৰ অনুমতিৰ ক’ত প্ৰয়োজন বুলি প্ৰশ্ন KMSSৰ সভাপতি ভাস্ক’ ডি শইকীয়াৰ।
“জেইল কতৃপক্ষ আৰু জিলা উপায়ুক্তই আদালতৰ ৰায়ক অৱমাননা কৰিছে। মানস কোঁৱৰে জামিন লাভ কৰাৰ পাছতো তেওঁলোকে কাৰাগাৰৰ পৰা কণ্টেইনমেণ্ট আৰু কোভিড প্ৰটোকলৰ দোহাই দি কাৰাৰুদ্ধ কৰি ৰাখিব খুজিছে মানস কোঁৱৰক।” সংবাদ মাধ্যমৰ আগত এইদৰে কয় ভাস্ক’ ডি শইকীয়াই।
ইপিনে, ক’ৰ’ণাৰ হতস্পট গুৱাহাটী কেন্দ্ৰীয় কাৰাগাৰত মানস কোঁৱৰক সুমুৱাই ৰাখি ক’ৰ’ণা আক্ৰান্ত কৰাৰ ষড়যন্ত্ৰত চৰকাৰ লিপ্ত হোৱা বুলিও ভয়ংকৰ অভিযোগ শইকীয়াৰ।
আনহাতে, কণ্টেইন মেণ্ট জ’ন আৰু কোৱাৰেন্টাইনৰ সকলো নীতি নিৰ্দেশনা মানি জেইলৰ বাহিৰত মানস কোঁৱৰক কোৱাৰেন্টাইন কৰাৰ ব্যৱস্থা কৰিবলৈ জিলা প্ৰশাসন আৰু জেইল কতৃপক্ষক দাবী ভাস্ক’ডি শইকীয়াৰ।
এই অন্যায়ৰ প্ৰতিবাদত মানস কোঁৱৰে জেইলৰ ভিতৰতে অনশন আৰম্ভ কৰা বুলি জানিব পৰা গৈছে।
