ৰাজ্যৰ পঞ্চায়ত আৰু গ্ৰামোন্নয়ন বিভাগ সমূহৰ ৮,৬২০ জন ঠিকাভিত্তিক কৰ্মচাৰীয়ে তেওঁলোকৰ দীৰ্ঘদিনীয়া দাবীসমূহ পূৰণৰ বাবে যোৱা এক অক্টোবৰৰ পৰা দীৰ্ঘদিনীয়া কৰ্ম বিৰতি পালন কৰিছে ৷
কিন্তু এই আন্দোলনৰ ১১ দিন উকলি যোৱাৰ পাচতো ঠিকাভিত্তিক কৰ্মচাৰীসকলৰ খবৰ লোৱা নাই অসম চৰকাৰ তথা প্ৰশাসনে ৷
সমান্তৰালভাৱে ৰাজ্যৰ বিভিন্ন পঞ্চায়তৰ লগতে গোলাঘাট পশ্চিম উন্নয়ন খণ্ডৰ কাৰ্যালয়ৰ অন্তৰ্গত ২০ খন পঞ্চায়তৰ ৫৯ গৰাকী ঠিকাভিত্তিক কৰ্মচাৰীয়েও এই কৰ্মবিৰতি পালন কৰি আহিছে ৷
ৰাজ্যৰ আন্দোলনকাৰী ঠিকাভিত্তিক কৰ্মচাৰী সকলে তেওঁলোকৰ নিজৰ প্ৰাপ্যৰ দাবীৰ লগতে চাকৰি সুনিশ্চিত কৰাৰ উপৰিও চাকৰি নিয়মীয়াকৰণ, নিয়মীয়াকৰণ নোহোৱা পৰ্যন্ত নিয়মীয়া কৰ্মচাৰীৰ হাৰত বেতন আদায়, নিয়মীয়া কৰ্মচাৰীয়ে লাভ কৰা সকলো সা-সুবিধা প্ৰদানৰ দাবীত দীৰ্ঘদিনীয়া কৰ্মবিৰতি পালন কৰিছে।
আনহাতে আন্দোলনৰ বাবে বোকাখাতৰ খণ্ড উন্নয়ন বিষয়াৰ কাৰ্যালয় আৰু ইয়াৰ ২০ খন পঞ্চায়তৰ কামকাজত অচলাৱস্থাৰ সৃষ্টি হোৱা বুলি স্বীকাৰ কৰিছে গোলাঘাট পশ্চিম উন্নয়ন খণ্ড, বোকাখাত কাৰ্যালয়ৰ খণ্ড উন্নয়ন বিষয়া জুৰি শইকীয়াই।
উল্লেখযোগ্য যে অহা ১৪ অক্টোবৰত ৰাজ্য চৰকাৰ আৰু ঠিকাভিত্তিক কৰ্মচাৰী পৰিষদৰ কেন্দ্ৰীয় সমিতিৰ মাজত দিচপুৰত এক আলোচনাত মিলিত হোৱাৰ কথা আছে ৷
এই আলোচনাও যদি বিফল হয় তেন্তে ৰাজ্যৰ ৮৬২০ গৰাকী ঠিকাভিত্তিক কৰ্মচাৰীয়ে জংগী আন্দোলনৰ পন্থা গ্ৰহণ কৰিব বুলিও চৰকাৰক সকীয়াই দিছে। লগতে ইয়াৰ ফলত হ’ব লগা যিকোনো পৰিস্থিতিৰ বাবে ৰাজ্য চৰকাৰেই জগৰীয়া হ’ব বুলিও আন্দোলনকাৰীসকলে উল্লেখ কৰিছে।